Viva: cov yam ntxwv yuav qhia tau tias koj yuav mob plawv nres (Heart attack)

Cov kab mob ua raws plawv nres yog dab tsi thiab ho muaj cov yam ntxwv mob zoo li cas uas peb tsim nyog kub siab txog kom peb thiaj tiv thaiv tau cov kab mob no los yog kom thiaj paub tias yuav ua li cas thiab thov kev pab cuam dab tsi li cas los yog thaum twg coj los pab cuam rau peb rau lub caij muaj tej xwm txheej no tshwm sim?

Cov yam ntxwv qhia tau tias koj mob plawv thiab plawv yuav nres (GettyImages) Source: Getty Images

Yog tham txog cov kab mob plawv nres no lawm ces yeej tseem muaj neeg Australia coob heev tsis puab li tias xyov cov yam ntxiv plob plawv ntawd yog cov mob zoo li cas, thiab ho yuav tau kub siab ua dab tsi li cas thiab thaum twg coj los pab rau yus los yog tus neeg yuav raug cov teeb meem plawv nres ntawd.

Clinical scientist Shoukat Khan uas yog ib tug Clinical Scientist los yog cov kws teeb txheeb thiab tsim kom tau ib cov tswv yim kho mob los sis yog tsim kom tau ib co twj kho mob los siv thiab los tiv thaiv kav mob los tshuaj ntsuam kab mob los sis yog los kho ib hom mob twg uas tswj cov Heart Support Australia uas yog ib cov national program coj los qhia kom zej tsoom paub txog cov kev tiv thaiv cov kab mob plawv nres thiab pab kom lawv rov qab zoo tuaj thiab ua tau lub neej li qub tom qab raug cov teeb meem plawv nres no lawm thiaj xav kom tej neeg sawv daws yuav tsum tau kub siab txog tej yam ntxwv mob ntau yam txuas ntxiv no uas tej zaum yuav ua rau ib tug neeg twg mob plawv nres tau.

Feem ntau mas cov kab mob plawv nres (Heart attacks) yeej cuam tshuam rau cov yam ntxwv ceev ceev hauv siab ntev tshaj li 2-3 ntiag tiv (minutes) los yog mob sai sai ces cia lu tsi mob ntxiv lawm tab sis ho rov qab mob dua ntxiv los yog ceev ceev hauv siab dua ntxiv. Muaj cov yam ntxwv li no txij ntawm yus hauv siab rov sauv uas ua rau yus mloog tau tias muaj dab tsi nias los yog tsub yus los sis zuaj yus los yog pheej mob ncuncus rau ntawm hauv siab tsis paub nyob, tej zaum kuj mob rau ib txhais caj npaj los yog tej zaum mob rau 2 txhais caj npab tib si, los yog ho mob nrob qaum thiab mob rau tej caj dab thiab mob yus lub plab. Ces ua rau yus txog txog siav thiab ho mob hauv siab, ua rau yus tawm fws txias zias, ua rau yus xeev siab dia hau ua voj ua vias thiab mloog tau tias zoo li yus taubhau sib sib heev.

Raws li cov kws kho mob uas paub zoo txog cov kab mob plawv nres no tau qhia, ces tej mob no yeej yog ib cov mob raws caj ces thiab cuam tshuam txog tej cwjpwm ua lu neej li pheej nyiam haus luam yeeb, tsis nyiam ua exercise, noj tej zaub mov tsis zoo rau yus lub cev yuav ua rau yus raug cov teeb meem plawv nres tau.

Yeej tau muaj cov kev teeb txheeb tau qhia ntxiv tias tej txiv neej tseem mob tau cov kab mob plawv nres no ntau dua poj niam txog li 2 npaug thiab. Ntxiv ntawd tej kws kho mob paub zoo txog tej teeb meem no tseem qhia ntxiv tias cov neeg Asia, Maori, African thiab Australia cov keeb cag neeg Aboriginal and Torres Strait Islander ces yog cov neeg uas yuav mob rau cov kab mob plawv nres no ntau dua.

Australia lub koom haum the Australian Bureau of Statistics cov zauv teeb txheeb 2018 yeej tau qhia tias muaj neeg Australia tshaj 17,000 tus tau tas sim neej los ntawm cov kab mob plawv nres (heart attack), thiab cov kab mob no tseem yog ib cov mob ua rau neeg tas sim neej coob tshaj plaws thiab.

Tej kws paub zoo txog tej teeb meem no thiaj hais tias txawm yus ua thiab hloov tej yam dab tsi me me ib yam tawg txhua hnub rau yus lub neej xwb los tej no yeej muaj peev xwm yuav pab kom yus ua tau lub neej zoo tuaj ntxiv, dua ntawm cov kev yuav tau noj tshuaj pab thiab ho mus ntsib mus cuag kws kho mob pab ntxiv, ces yuav muaj peev xwm tiv thaiv kom yus txhob mob plawv nres los yog yuav tiv thaiv kom cov neeg uas twb mob plawv nres ib zaug dhau los tsis txhob rov qab mob plawv nres rau lub sij hawm li 6 lub hli los yog 1 lub xyoos tom qab tau muaj tej xwm txheej no tshwm sim thiab.

Mloog tau SBS Radio Hmong Program rau hnub Thursday 6 pm AEST thiab hnub Sunday 11 am AEST. Koom tau ntxiv ntawm SBS Hmong Facebook. Mloog thiab download tau cov xovxwm kaw ua suab (podcasts) ntawm Stitcher, Apple podcasts los yog Google podcasts thiab ntawm podcast platforms tau.

Mloog tau cov xovxwm tshaj tawm rau ib hnub twg, cov zaj xovxwm, thiab cov zaj lus nrog tej qhua tshwj xeeb tham ua lus Hmoob thiab lub Askiv tau raws li hauv qab no: