Australia tej neeg raug tua cuam tshuam txog teeb meem kub ntxhov hauv lub cuab yig

Tau muaj ib co xov xwm tshiab qhia tias tsaib no tau muaj Australia tej poj niam raug tua tuag cuam tshuam nrog tej teeb meem kub ntxhov hauv lub caub yig ntau zog tuaj ntxiv lawm.

A general view of people attending a rally to a call for action to end violence against women outside Parliament House in Canberra Source: AAP / LUKAS COCH/AAPIMAGE

Tsab ntawv cej luam Homicide in Australia uas tau coj los nthuav tawm rau hnub tim 30 lub 4 hlis ntuj (2024) tau qhia tias muaj tej neeg raug tua tuag cuam tshuam txog tej teeb meem kub ntxhov ntawm lub cuab yig ntau tuaj ntxiv yuav laug txog li 30 feem pua rau tsaib no rau lub caij uas tau muaj tej neeg rwg npoj tawm tsam thoob teb chaws nqua hu kom nom tswv los xaus tej teeb meem kub ntxov tsim rau tej poj niam.

Dr Rick Brown uas yog tus coj lub koom haum Australian Institute of Criminology tau qhai tias yog ib co kev txheeb tau uas txaus txhawj xeeb heev 'vim txij li xyoo 1989 uas tau tsim cov program txheeb tej neeg raug tua los ces twb muaj tej poj niam txog li 1667 tus raug lawv tus txiv/hluas nraug nram ntej ub los yog tam sim no tua tuag lawm.'

Yog li tsab ntawv cej luam no thiaj tau muab cov teeb meem kub ntxhov teev ua 3 yam li cuam tshuam lub cuab yig, cuam tshuam nrog ib tug neeg lawv paub thiab cuam tshuam nrog ib tug neeg txawv uas tej poj niam tsis paub.

Professor Heather Douglas uas paub zoo txog cai lij choj ntawm University of Melbourne thiab hais tias 'tej poj niam coob heev yeej tau hu thov kev pab cuam ntawm tub ceev xwm tab sis tsis tau tej kev pab cuam raws li lub sij hawm lawv xav tau. Peb yeej tau kho dua tej cai ntau yam tab sis zoo li yeej tseem tsis tau ua tib zoo coj tej cai ntawd los siv kom tau hauj lwm tiag.'

Ces Australia tus thawj pwm tsav Anthony Albanese thiaj hais tias peb yuav tsum nrhiav kom tau tej tswv yim uas siv tau ntev thiab siv tau kiag tam sim no mas thiaj yuav los daws tau tej teeb meem no zoo.

Nws hais tias 'Peb yuav tsum tau lees paub tias yog ib co teeb meem uas yuav tau daws ntev rau yav tom ntej, thiab yuav tau hloov tej neeg cov kev xav, thiab yuav tau siv ntau yam tswv yim. Tab sis peb kuj xav tau ib co tswv yim los siv daws kiag tej teeb meem no tam sim no thiab.'

Yog tias koj los yog ib tug twg ntsib teeb meem kub ntxhov hauv lub cuab yig los yog raug yuam deev ces hu rau lub koom haum 1800RESPECT tus xov tooj 1800 737 732 los sis yog mus txheeb tau ntawm 1800RESPECT.org.au. 

Thiab yog tias koj ho poob rau tej xwm txheej ti tes ti taw uas yuav raug kev phom sij rau koj txoj sia ces muaj peev xwm hu rau tus zauv xov tooj Triple Zero (000).

Los sis yog txheeb tau lub koom haum pab tej txiv neej The Men’s Referral Service 

cov program 'No to Violence', thiab hu tau rau lawv tus xov tooj 1300 766 491.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.