Cov kev rwg npoj tawm tsam kom nom tswv nrog daws teeb meem kub ntxhov hauv lub cuab yig

Tau muaj ntau caum cov kev rwg npoj tawm tsam tau nqua hu kom nom tswv Australia kub siab maj ceev nrooj los nrog daws teeb meem kub ntxhov hauv lub cuab yig thiab rau txim kom hnyav rau tej neeg pheej tsim tej teeb meem no rau Australia tej poj niam.

Women gather at the Ballarat rally against gendered violence Source: SBS

Tom qab uas Australia tej nom tswv uas muaj thawj pwm tsav thiab tej hau xeev tau sab laj ceev tham txog tej tswv yim yuav pab tiv thaiv thiab daws teeb meem hauv cuab yig ces kuj pom zoo tias yuav tshwm nyiaj ze txog li 1 billion dollars coj los pab tej poj niam tsiv tawm ntawm tej teeb meem no. Uas yuav tau nyiaj $5,000 yog tias tus poj niam ntawd tsiv tawm ntawm tej teeb meem kub ntxhov thiab yuav tau nyiaj ntsuab kiag txog li $1,500 thiab mam li tau $3,500 siv lwm cov services los yog yuav zaub mov noj ntawd pab.

Lub limtiam dhau los tom qab tau muaj ob tug poj niam tau tas sim neej cuam tshuam txog teeb meem kub ntxhov hauv lub cuab yig ces thiaj muaj tej neeg tawm tsam thoob teb chaws Australia thiab hais tias 'cov teeb meem no yog ib cov teeb meem puas tsuaj rau haiv neeg no.'

Katherine Berny ntawm lub koom haum National Women's Safety Allince thiaj hais tias ''yeej ua rau kuv ib nyuag meem txom heev, vim tej xov xwm tshaj tias yuav tau tso tseg tej xwm txheej no. Tab sis txawm 10 xyoo dhau los no tau muaj tej poj niam tshaj 640 tus raug tua tuag los zoo li yeej tseem tsis tau muaj peev xwm xaus tau tej xwm txheej no. Tej neeg pab tswj tej xwm txheej no los yeej tsis tshua muaj peev xwm lis tej dej num no lawm. Peb yeej ntsib teeb meem loj heev thiab xav tau tswv yim los daws tej teeb meem no kom sai tsis yog tseem yuav tos 6 hli ntxiv.'

Brittany Cozic ntawm lub koom haum What Were You Wearing tau qhia rau lub chaw nthuav xov xwm tshooj 9 tias tsim nyog tsoom fwv Albanese yuav tau muab cov xwm txheej kub ntxhov hauv lub cuab yig ua ib cov 'national emergecy'.

Cozic hais tias 'Yog thaum lawv lees paub li hais ntawd lawm, ces yuav lees rau neeg Australia tias yog tej yam ua tsis yog ua rau muaj teeb meem rau peb teb chaws thiab rau tej neeg raug tej teeb meem no xwb tab sis tseem raug rau lawv tsev neeg thiab peb lub teb chaws tag nrho thiab, vim tam sim no ua rau tej poj niam ntshai heev. Thiab kuv mloog tau tias ua rau peb haiv neeg no tu siab heev.'

Yog li ces tsoom fwv xeev New South Wales (NSW) thiaj tau qhia limtiam dhau los tias nws yuav los txheeb tej bail laws tom qab Ms Ticehurst raug nws tus txiv tua tuag ntawm Sydney.

Chris Minns uas yog tus hau xeev NSW thiaj hais tias 'Kev nyab xeeb thiab kev ruaj ntseg rau tej neeg raug teeb tej teeb meem no yog ib co tseem ceeb heev uas yuav tau nrho xyuas thaum tej neeg raug liam tias tsim tej teeb meem no xa daim ntawv bail application rau gregistras, judges los yog magistrate court ntawm NSW. Kuv yeej nkag siab txog tej neeg cov kev mob siab thiab chim thiab xav nug txog tej lus nug no. Yog li peb thiaj yuav tau siv lawv tej lus nug no ua ib cov kev taw qhia peb kom nrhiav tau lus teb rau lawv.'

Karen Webb uas yog tus coj tub xeev xwm NSW thiaj tau qhia rau xov tooj cua 2GB tias 'tej registrars tsis muaj peev xwm tswj tau tej kev txiav txim siab cuam tshuam txog cov bail lawm. Thiab nws hais tias 'cov teeb meem kub ntxhvo hauv lub cuab yig uas ua phem rau tej me nyuam thiab yuam deev lwm tus yog ib cov kev ua txhaum ntsiag to thiab ua rau tub ceev xwm yuav tau siv sij hawm ntau heev daws tej teeb meem no.'

Ntawm xeev Victoria los Lauren Callaway uas yog tus neeg ua hauj lwm pab tus hau tub ceev xwm kuj khwv tau ib lub tswv yim tias kom yuav tsum teev tej neeg tsim teeb meem kub ntxhov rau lwm tus tej npe thiab hais tias tej neeg muaj cai paub tej neeg no thiab.

"Ib hnub twg peb yeej txhom tej neeg 80 leej uas tsim teeb meem kub ntxhov hauv lub cuab yig thiab rau siab ua hauj lwm kom coj tau tej neeg no mus hais plaub. Tab sis kuj yuav muaj kev cov nyom thiab yog tias yuav muab txhua tus neeg no kaw ib txhis. Yog li thiaj xav kom txhua tog muaj feem los koom tes nrhiav kom tau ib txoj xub ke zoo tshaj plaws los tswj tej neeg pheej ua txhaum no,'' raws li Callaway hais.

Tsoom fwv xeev Western Australia los kuj tau qhia tias nws yuav tshwm nyiaj 96 million dollars los pab tiv thaiv kom tsis txhob muaj tej teeb meem kub ntxhov hauv lub cuab yig no rau tej neeg raug tej teeb meem no. Tab sis Katherine Burney ntawm lub koom haum National Women's Safety Allince hais tias tej nyiaj no xwb yeej tsis txaus.

'Peb xav kom tej neeg tawm los qhia tej teeb meem no. Peb xav pab lawv, thiab peb xav nrhiav tej xub ke los pab lawm. Tab sis thaum peb mus siv tej system pab ces tseem muaj kev sib chab sib chaws heev ntawm tej nyiaj nom tswv xeev thiab tsoom fwv teb chaws coj mus pab tej neeg, uas tsis paub tias seb puas yuav pab ncaj qha rau tej neeg xav tau cov kev pab cuam no. Vim tej teeb meem no yog ib cov teeb meem haiv, thiab zej tsoom kub siab txog ces peb yuav tau los sib tham, kom tej neeg txheeb tej xwm txheej no thiab tawm los qhia nom tswv, thiab peb muaj lub luag hauj lwm yuav tau ua tib zoo xyuas kom txhua leej txhua tus uas xav tau txais kev pab cuam tau siv cov kev pab cuam no.'

Txawm li cas los Mark Dreyfus uas yog Australia tus kws lij choj teb chaws kuj tau hais rau hnub zwj Cag (Saturday) tias txij li tus tsoom fwv Albanese tau los ua nom no nws yeej tau tshwm nyiaj $2.3 billion los daws 'txiv neej cov kev tsim teeb meem kub ntxhov ntau heev no' lawm.

Tab sis Senator David Shoebridge ntawm pab nom Greens tau nqua hu kom txiv neej yuav tsum tau los nrog daws tej teeb meem no thiab.

'Kuv xav tias tej kev tawm tsam no tseem ceeb heev uas peb yuav tau los kub siab txog neeg Australia cov kev xav, thiab tej neeg muaj feem txiav txim siab daws tej xwm txheej no thiab peb tej nom tswv. Yog li thiaj yuav tau xyuas kom tsim tau tej kev pab cuam pab ncaj nqa rau tej poj niam, ces peb thiaj yuav tau kho dua peb tej kev legal structures kom rau txim rau tej neeg ua txhaum thiab pab kom tej neeg raug tej teeb meem no los yog dim tej teeb meem no tsis txhob ntshai tsis txhob nyuaj siab txog peb cov legal system, uas tsim yog yuav yog ib cov sytem los pab tej poj niam,' raws li Senator Shoebridge hais.

Yog tias koj los yog ib tug twg ntsib teeb meem kub ntxhov hauv lub cuab yig los yog raug yuam deev ces hu rau lub koom haum 1800RESPECT tus xov tooj 1800 737 732 los sis yog mus txheeb tau ntawm 1800RESPECT.org.au. Thiab yog tias koj ho poob rau tej xwm txheej ti tes ti taw uas yuav raug kev phom sij rau koj txoj sia ces muaj peev xwm hu rau tus zauv xov tooj Triple Zero (000).

Los sis yog txheeb tau lub koom haum pab tej txiv neej The Men’s Referral Service cov program 'No to Violence', thiab hu tau rau lawv tus xov tooj 1300 766 491.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am,los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.