Tej hav zoov kub hnyiab uas tej zaum yuav muaj rau koj tej chaw lub caij nplooj hlav

Nod yog tej chaw uas tej zaum yuav muaj hav zoov kub hniav ntau dua rau lub caij ntau hli ntxiv no.

The bushfire outlook for spring has identified areas that will be at increased threat of bushfires in the coming months. Source: Getty / Roni Bintang

Ntsiab lus tseem ceeb:

• Muaj ntau cheeb tsam ntawm Australia 4 lub xeev yog cov chaw uas tej zaum yuav muaj hav zoov kub hnyiab ntau dua lub caij nplooj hlav no.
• Tej huab cua sov zog, thiab qhuav dua thiab ''ntau yam xwm txheej'' yog tej uas tej zaum yuav ua rau muaj hav zoov kub hnyiab rau lub caij nplooj hlav.
• Tsis tas li ntawd los ntshe kuj yuav muaj hav zoov kub hnyiab 'li qub' ntawm tej xeev ACT, Tasmania thiab Western Australia.

Tom qab tau muaj huab cua sov tshaj plaws lub 8 hli ntuj (2024), ces ua rau muaj ntau thaj chaw ntawm Australia yuav muaj cib fim muaj hav zoov kub hnyiab ntau tuaj ntxiv rau lub caij ob peb hlis ntxiv tom ntej no.

Lub koom haum National Council for Fire and Emergency Services tau txheeb tau tias tej chaw twg uas yuav xub kub siab tshaj plaws ua ntej yog tej chaw uas yuav muaj tej huab cua ua rau yuav muaj hav zoov kub hnyiab tau rau lub caij nplooj hlav no.

Ces daim luaj chib lig no thiaj qhia tias lub xeev twg yuav muaj hav zoov kub hnyiab raws cov caij Seasonal Bushfire Outlook for Spring 2024.

Tej xeem sab qaum teb

Thiaj muaj tej chaw dav heev ntawm xeev Northern Territory (NT) thiab Queensland (QLD) yog cov chaw uas tej zaum yuav muaj hav zoov kub hnyiab tau raws li tau tshuaj ntsuam.

Thiab tej xwm txheej uas tau tshwm sim rau yav lig lub caij ntuj no uas muaj tej khov thiab cua hlob heev thiaj ua rau tej nroj tsuag qhuav heev, thiab muaj ntau thaj hav zoov ntawm plawv xeev thiab sab qab teb ntawm xeev Queensland.

Daim duab qhia txog tej chaw uas tej zaum yuav muaj tau hav zoov kub hnyiav rau ntau hli ntxiv no raws li cov Seasonal Bushfire Outlook Spring 2024. Source: SBS

Raws li cov kev tshuaj ntsuam no hais ces yeej yuav muaj tej xwm txheej "elevated curing activity" is txuas ntxiv ntawm tej xeev rau lub caij nplooj hlav, thiab kuj kwv yees tias huab cua yuav sov tshaj li ib txwm sov rau nruab hnub ntawm tej xeev feem coob.

Tej nroj tsuag los kuj tab tom qhuav ntawm xeev NT, uas muaj ntau thaj chaw ntawm Alice Springs, Barkly thiab tej chaw tiaj nyom uas tswj kom tsis txhob kub hnyiab yog cov chaw uas tej zaum yuav muaj cib fim kub hnyiab ntau dua.

Yog li ntawd thiaj tau nqua hu rau tej tswv teb thoob lub xeev NT kom yuav tau npaj tswv yim tswj hluav taws uas siv tau tam sim no thiab xyuas kom paub txog tias ho yuav muaj hav zoov kub hnyiab zoo li cas.

Yuav kub hnyiab tau yooj yim ntxiv thiab yuav kub kis tau zoo dua

Ces thiaj yuav raug kev phom sij ntau dua los ntawm tej xwm txheej kub hnyiab ntau dua rau tej chaw sab hnub poob thiab hnub poob qab teb ntawm xeev Victoria (VIC) thiab ces kaum sab qab teb hnub tuaj ntawm xeev South Australia (SA).

Sab qab teb hnub tuaj ntawm SA los kuj muaj tej av noo tsawg heev vim rau qhov muaj ntuj los nag tsawg dua ib txwm los thiab kuj muaj tej huab cua sov dua tej ib txwm muaj rau lub caij ntuj no.

Ces thiaj tau kwv yees tias ntshe yuav muaj tej huab cua sov tshaj tej ib txwm sov mus txog rau tej huab cua kub heev rau lub caij ntuj nplooj hlav uas yuav ua rau muaj tau hav zoov kub hnyiab.

Hos thaj chaw sab hnub poob thiab hnub poob qab teb ntawm xeev Victoria ces tsis yog tias qhuav tshaj li ib txwm qhuav nkig rau lub caij ntuj no xwb tab sis tseem qhuav heev rau lub caij nplooj zeeg thiab ncaij ntuj no thiab.

Ces cov kev kwv yees txog tej huab cua raws caij thiaj txheeb tau tias tau muaj tej nroj tsuag xyoo ntoo uas qhuav/tuag lawm ntawm tej hav zoov ces tej zaum ''thiaj yuav ua rau kub hnyiab tau yooj yim dua thiab yuav kub kis rau lwm qhov.''

Sov thiab qhuav

Kuj tau kwv yees tias yeej tseem yuav muaj hav zoov kub hnyiab 'li qub' ntawm tej xeev ACT, Tasmania thiab Western Australia, tab sis tag nrho peb lub xeev no yeej yuav muaj huab cua sov dua rau lub caij nplooj hlav uas yuav ua rau muaj tau hav zoov kub hnyiab rau lub caij yuav txog caij ntuj sov thiab.

Hos ACT ces, tej chaw tua hluav taws thiab tej neeg tswj tej liaj teb yuav tau los hlawv tej nyom rau lub caij nplooj hlav kom thiaj tiv thaiv kom tsis txhob muaj hav zoov kub hnyiab.

Tasmania (TAS) ces tsis yog tias huab cua yuav sov zog xwb tab sis tseem yuav qhuav dua thiab.

Nyob rau sab hnub poob ces kuj kwv yees tias yuav muaj ntuj los nag rau lub caij nplooj hlav uas yuav ntoo rau tej av tom qab uas tsis muaj ntuj los nag rau sawb qab teb ntawm lub xeev no ua ntej lub 8 hli ntuj.

Cov kev los nag pab kom tswj tau tej xwm txheej hav zoov kub hnyiab

Cov kev muaj nag los ntau tshaj tej ib txwm los rau lub caij ntuj no tau pab tiv thaiv kom tsis txhob muaj hav zoov kub hnyiab thoob lub xeev New South Wales (NSW).

Thiab cov kev tseem yuav muaj ntuj los nag ntxiv kuj tsuas ua rau cov kev yuav muaj tau tej xwm txheej hav zoov kub hnyiab 'li ib txwm muaj' rau lub caij nplooj hlav xwb.

Yuav tau npaj thoob plaws Australia

Raws li lub koom haum National Council for Fire and Emergency Services hais tias tsis yog ib cov kev kwv yees tias qhov twg los yog thaum twg yuav muaj tau hav zoov kub hnyiab tab sis tsuas yog ib co xub ke los txheeb tej chaw uas tej zaum yuav muaj peev xwm kub hnyiab tau xwb, ''yog li ntawd thiaj xav kom tej zejzog paub txog qhov no thiab ua tej yam tsim nyog ua coj los npaj''.

Thiab lub koom haum no los kuj tau nqua hu lom neeg Australia yuav tau ceev faj thiab yog tias tseem tsis tau npaj, ces xav kom los npaj lawv tej vaj tse rau lub caij no ua ntej yuav txog lub caij ntau hluas uas huab cua yuav kub dua ntawd.

Listen to SBS Hmong on Thursday 6 pm, Sunday 11 am, or join us on Facebook, Google podcasts, Spotify or Apple podcasts. Download SBS Audio app and follow us on SBS Hmong pod follow.