ත්‍රස්තවාදය වැළක්වීමේ ක්‍රමවේදය යටතේ පසුගිය සෙනසුරාදා රාත්‍රියේ සිඩ්නි නුවර සිදු කළ හදිසි ආරක්ෂක වැටලීම් හේතුවෙන් සැකකටයුතු පුද්ගලයින් සිව් දෙනෙකු අත් අඩංගුවට ගෙන තිබේ.
දැව කොටස් සහ පුපුරණ ද්‍රව්‍ය යොදාගනිමින් නිවෙස්දී බෝම්බයක් සාදා එමගින් ගුවන් යානයක් පුපුරවා හැරීමට සූදානම් වෙමින් සිටි බව වාර්තා වේ.
සිඩ්නි නුවර Surry Hills, Lakemba, Wiley Park සහ Punchbowl යනාදී ප්‍රදේශ වල නිවාස 5 ක් මෙම වැටලීම් වලට හසුවී තිබේ.
මේ සම්බන්ධව අද දිනයේත් ඔස්ට්‍රේලියානු පොලීසිය විසින් සෝදිසි මෙහෙයුම් පවත්වන බව නිවේදනය කර ඇත.
ත්‍රස්තවාදී ක්‍රියා සඳහා වැට බැඳ ඔස්ට්‍රේලියාව වාසය කිරීමට වඩාත් ආරක්ෂාකාරී රටක් බවට පත් කිරීමට හැකි සෑම උත්සාහයක්ම ගන්නා බව ඔස්ට්‍රේලියාවේ නීතිය පිළිබඳ අමාත්‍ය Michael Keenan පවසයි.
ඔස්ට්‍රේලියානු ආරක්ෂක අංශ විසින් පසුගිය කාලය තුළ පෙරාතුවම ව්‍යක්ත කළ 13 වන ත්‍රස්තවාදී කුමන්ත්‍රණය මෙය බවද අමාත්‍යවරයා Sky පුවත් සේවයට පැවසීය.
