ඔස්ට්‍රේලියාව තුළ ස්ථාපිතවූ සරණාගතයින් හට ඔස්ට්‍රේලියානු බලධාරීන් අඩු සැලකිලි දක්වන බවට ඔස්ට්‍රේලියාවේ සරණාගත කවුන්සිලය සහ Fairfield Multicultural Interagency ආයතනය එක්ව ඉදිරිපත් කළ නවතම වාර්තාවක් පෙන්වා දෙයි.
විශේෂයෙන්ම අදාළ පුද්ගලයින්ව දැනුවත් කිරීමකින් තොරව ඔවුන්ගේ සුබ සාධන දීමනා කප්පාදු කරන බවට ඔවුන් චෝදනා කරයි.
සරණාගතයින් තම ඉංග්‍රීසි පන්ති සඳහා සහභාගී වෙමින් සිටියදී හිටි හැටියේම Jobactive වැඩසටහන යටතේ රැකියා සොයාදීමේ අනිවාර්ය රැස්වීම් සඳහා පන්තියෙන් පිටතට කැඳවන බවට ඔස්ට්‍රේලියාවේ සරණාගත කවුන්සිලයේ ප්‍රධාන විධායක Paul Power චෝදනා කරයි.
නමුත් එම රැස්වීම් අවසානයේ අදාළ සරණාගතයින් හට රැකියාවක් නොලැබෙන බවද ඔහු පෙන්වා දෙයි.
ඔස්ට්‍රේලියානු රජයේ බිලියන 1.4 ක් වටිනා Jobactive වැඩසටහන පිළිබඳ විමර්ශනයක් සිදු කළ යුතු බව ඔස්ට්‍රේලියාවේ සරණාගත කවුන්සිලයේ ප්‍රධාන විධායක Paul Power , A-B-C පුවත් සේවයට පැවසීය.
