निर्वाचन आयोगको आचारसंहिता अनुसार यस मौन अवधिमा चुनाव प्रचार प्रसारका लागि कुनै पनि छलफल, अन्तरक्रिया, सभा, सम्मेलन, कार्यशाला, गोष्ठी जस्ता क्रियाकलाप गर्न पाइँदैन, र गरेको पाइएमा दण्डनीय हुने छ। तर आचारसंहिताको उल्लङ्घन भने जारी नै छ।
मौन अवधिमा प्रेस विज्ञप्ति निकालेको भनेर निर्वाचन आयोगले सत्तारूढ गठबन्धन निकटका पत्रकार सङ्गठनहरूसँग स्पष्टीकरण समेत सोधेको छ।
आयोगले सबै जनालाई प्रचार प्रसारका सामग्री हटाउन र सामाजिक सञ्जालबाट पनि त्यस्ता पोस्टहरू हटाएर जस्ताको तस्तै पार्न भनेको छ, तर सामाजिक सञ्जालबाट भने कतिपय सामग्री हटाइएका छैनन्।
यसका साथै आचारसंहितामा प्रचार प्रसारका लागि उम्मेदवारले खर्च गर्न सक्ने रकमको तोकिएको सीमाभन्दा बढी नै उम्मेदवारहरूले खर्च गरेको पनि देखिएको छ।
कूल ३५ हजार भन्दा बढी पदका लागि डेढ लाख भन्दा बढी उम्मेदवारी परेको निर्वाचन आयोगले बताएको छ।
रिपोर्ट सुन्नुहोस्: नेपालमा स्थानीय निर्वाचन शुक्रवार, चुनावी गठबन्धन गरेका पार्टीका कार्यकर्ताहरू रुष्ट हाम्रा थप अडियो प्रस्तुतिहरू पोडकास्टका रूपमा उपलब्ध छन्। यो नि:शुल्क सेवा प्रयोग गर्न तपाईंले आफ्नो नाम दर्ता गर्नु पर्दैन। पोडकास्टमा सामाग्री उपलब्ध हुनासाथ सुन्न यहाँ थिच्नुहोस्।
चुनावका लागि सत्तारूढ दलहरू नेपाली काँग्रेस, माओवादी, नेकपा एकीकृत समाजवादी, जनता समाजवादी पार्टी, र राष्ट्रिय जनमोर्चा पार्टीले गठबन्धन बनाउने निर्णय गरेका छन्।
तर केन्द्रीय स्तरमा यस्तो निर्णय गरिए तापनि थुप्रै स्थानीय तहमा कार्यकर्ताहरू यस्तो गठबन्धनका विरुद्धमा आक्रोशित भइरहेका छन्।
भरतपुरमा माओवादी नेता प्रचण्डकी छोरी रेणु दाहाललाई नेपाली काँग्रेसले समर्थन गरेपछि नेपाली काँग्रेसका कार्यकर्तामा निकै असन्तुष्टि देखिएको छ भने पछिल्लो निर्वाचनमा मतपत्र च्यातेर विवादित परेकी दाहालको पक्षमा बोलेपछि नेपाली काँग्रेसका अध्यक्ष शेरबहादुर देउवा यस पटक आलोचित बनेका छन्।
"यो गठबन्धन टुटाउने षडयन्त्र छ। यो षडयन्त्रमा फस्यो भनेदेखि हाम्रो पार्टी पनि खतम हुन्छ, वहाँहरूको पनि त्यही हो। कुनै पनि हालतमा यो गठबन्धन टुटाउने षडयन्त्र भरतपुर र चितवनबाट हुने सङ्केत छ," शेरबहादुर देउवाले भने।
"भोलि हाम्रो साथीहरूले मौका पाइहाल्छन् नि, राम्रो काम गर्नोस् न। वहाँलाई पछि छोड्दिनोस् भनौँला, हामीलाई सहयोग गर्नोस् भनौँला। वहाँलाई सहयोग गरेर हेर्नुपर्यो नि हामीले यो पल्ट। त्यो हुनाले हाम्रो कर्तव्य हो अहिले वहाँलाई जिताउने। यस्तो राम्रो काम गर्ने मान्छेलाई हरायो भने त्यहाँका जनताले के भन्लान्?"
भरतपुर लगायतका ठाउँमा गठबन्धनप्रति चित्त नबुझेपछि बागी उम्मेदवार पनि उठेका छन्। बागीलाई उम्मेदवारी फिर्ता दिन लगाउनका लागि शीर्ष नेताहरूले दौडधुप गरिरहेका थिए।
नेपाली काँग्रेसका शीर्ष नेताहरू शेरबहादुर देउवा र रामचन्द्र पौडेलकै गृह जिल्लामा पनि गठबन्धनको तालमेल हुन सकेको छैन।
देशभरि नै यस्ता अचम्मका गठबन्धन भइरहेका छन् जहाँ विगतमा नितान्त विपरीत सिद्धान्त भएका नेपाली काँग्रेस र माओवादीले एउटै उम्मेदवार उठाइरहेका छन्।
काँग्रेसलाई हँसिया हथौडामा वा माओवादीलाई रूख चिन्हमा मतदान दिन नेताहरू आग्रह गरिरहेका छन् भने माधव नेपाल र झलनाथ खनालले पहिलो पटक सूर्य चिन्ह छोडेर नयाँ चिन्ह कलम अन्तर्गत प्रतिस्पर्धा गर्दै छन्।
Preperation of local election in nepal is all set. Source: Abhishek Maharjan/Sipa USA
यी तीन दलका शीर्ष नेतामा पनि असन्तुष्टि देखिएको छ: भागबन्डामा आफ्नो दललाई कम स्थान दिइएको नेकपा एकीकृत समाजवादीका माधव नेपालले गुनासो गरेका छन् भने नेपाली काँग्रेसका शेरबहादुर देउवा र माओवादीका प्रचण्डका बिचमा गठबन्धनको भविष्यबारे अविश्वास देखिएको छ।
त्यस्तै, कतिपय स्थानीय निकायमा भने गठबन्धनका दलहरूको कुरा नमिलेको उम्मेदवार सङ्ख्याले देखाएको छ। ३५ हजार भन्दा बढी पदका लागि गठबन्धनको मात्रै झन्डै ७५ हजार उम्मेदवारी परेका छन्, अर्थात् सबै ठाउँमा गठबन्धन हुन सकेको छैन।
यसै क्रममा काठमान्डूको मेयरको दौड चर्चित बनेको छ।
The general public supporting different political candidates while attending election rally of five party alliance organized in Kathmandu, Nepal. Source: Abhishek Maharjan/Sipa USA
२५ वर्ष अगाडि काठमान्डुको मेयर रहेका केशव स्थापित महिलाका बारेमा अशोभनीय टिप्पणीहरू गरेर आलोचित बनेका छन् भने पर्याप्त बालेन शाह र भूतपूर्व मिस नेवा सुनिता डङ्गोलले युवाहरूमाझ हलचल मच्चाएका छन्।
यो परिदृश्यले फेरिँदो चुनावी प्रचार प्रसार गर्ने शैलीको पनि उदाहरण दिएको छ।
घरदैलो अभियान र पर्चा, पोस्टर सँगसँगै सामाजिक सञ्जालमा पनि सबै दलहरूले चुनावको प्रचार प्रसार गरिरहेका छन् भने विशेष गरी युवाहरूले युवा उम्मेदवारका पक्षमा अनलाइन अभियानहरू पनि सञ्चालन गरिरहेका छन्।
