ဒ်သိးအီစထြ့လယါကီၢ်သုးဖိအနီၣ်ဂံၢ် ကထီၣ်ဘးတုၤလၢတကလီၢ်ဘျဲၣ်အဂီၢ် တၢ်ရဲၣ်ကျဲၤပာ်လၢမ့ၢ်တုၤလီၤဖဲ ၂ဝ၄ဝနံၣ်န့ၣ် ကမၤအါထီၣ်သုးဖိအနီၣ်ဂံၢ်တုၤလၢအဂၤ ၁၈ဝဝဝ ဂၤန့ၣ်လီၤ။
လၢတၢ်ကမၤအါထီၣ်ပှၤသုးဖိအနီၣ်ဂံၢ်အံၤအဂီၢ် တၢ်လၢၤဘူၣ်လၢၤစ့ကအိၣ်ဝဲဒၣ် ဒီလၣ် ၃၈ ဘံလယၢၢ်န့ၣ်လီၤ။
နံၣ် ၂ဝအတီၢ်ပူၤ ကမၤအါထီၣ်သုးဖိအနီၣ်ဂံၢ် အမျးကယၤ ၃ဝ ဒီး မ့ၢ်တုၤဖဲ ၂ဝ၄ဝ နံၣ်ကတၢၢ်န့ၣ် သုးဖိထီရီၤအနီၣ်ဂံၢ်ကအိၣ်တုၤအဂၤ ၈ဝဝဝဝ ဒီး မ့မ့ၢ်သုးပှၤဘၣ်မူဘၣ်ဒါအဂုၤအဂၤအနီၣ်ဂံၢ်န့ၣ် အကအိၣ်ဝဲအဂၤ၁ဝဝဝဝဝ န့ၣ်လီၤ။
ဖဲတၢ်မၤအါထီၣ်သုးအဂံၢ်အဘါတၢ်ရဲၣ်တၢ်ကျဲၤအပူၤန့ၣ် ပၣ်ဃုာ်ဒီး တၢ်မၤလဲၢ်ထီၣ်အါထီၣ် ကဘီယူၤထံတၢ်ဖံးတၢ်မၤအတၢ်ဝးတရံးအသးသ့ၣ်တဖၣ်၊ ကလံၤသုးတၢ်ဖံးတၢ်မၤ ဃုာ်ဒီး တၢ်ဒီသဒၢဝဲၤကျိၤမျိာ်သၣ် အတၢ်ဖံးတၢ်မၤဒီး တၢ်ဒီသဒၢအ့းထၢၣ်နဲးစဲၣ်ဘၢၣ်အတၢ်ဖံးတၢ်မၤသ့ၣ်တဖၣ်န့ၣ်လီၤ။
တၢ်ဒီသဒၢဝဲၤကျိၤကိတိာ် ဖံထၢၣ်ဒူထၢၣ်စံးဝဲဒၣ် တကီၢ်ခါဖဲလၢ အ့ၣ်ဒိၣ်—ပစံၣ်ဖ့းဟီၣ်ကဝီၤအပူၤ တၢ်ဖ့ၣ်ဆၢအိၣ်ထီၣ်ဒီး ယူၤရပၤဟီၣ်ကဝီၤအပူၤ တၢ်ဖ့ၣ်ဆၢသ့ၣ်တဖၣ် အဃိ အရ့ဒိၣ်လၢ အီစထြ့လယါကီၢ် ကဘၣ်မၤလဲၢ်ထီၣ် အါထီၣ် တၢ်ဒီသဒၢဝဲၤကျိၤအဂံၢ်အဘါသ့ၣ်တဖၣ်န့ၣ်လီၤ။
လီၤဆီဒၣ်တၢ်န့ၣ် ကဘၣ်မၤလဲၢ်ထီၣ်အါထီၣ်ဝဲဒၣ် မူဒီတၢ်ဖံးတၢ်မၤ၊ စဲၣ်ဘၢၣ်၊ သုးထံ၊ သုးယူၤထံဒီး ကဘီလၢတလိၣ်ပှၤကညီနီအီၤဘၣ်သ့ၣ်တဖၣ် အတၢ်ဖံးတၢ်မၤတဖၣ်န့ၣ်လီၤ။
အဝဲစံးစ့ၢ်ကီးဝဲဒၣ်လၢ မ့ၢ်အဲၣ်ဒိး ဒိးသန့ၤ မၤစၢၤလိာ်သးဒီး ယူၣ်ခ့ၣ်ကီၢ်၊ ကီၢ်အမဲရကၤဒီး န့ၢ်တိသိၣ်မှံၤကရူၢ်သ့ၣ်တဖၣ်န့ၣ် တၢ်မၤလဲၢ်ထီၣ်အါထီၣ် ဂံၢ်ဘါဒ်သိးအံၤသ့ၣ်တဖၣ်န့ၣ် မ့ၢ်တၢ်လၢအရ့ဒိၣ်န့ၣ်လီၤ။
အီစထြ့လယါကီၢ်ကမၤလဲၢ်ထီၣ်အါထီၣ် တၢ်ဒီသဒၢဝဲၤကျိၤအဂံၢ်အဘါအံၤ ပှၤထီဒါတၢ် လ့ၣ်ဘၢၣ်ပၣ်တံၣ်ဆီၣ်ထွဲဝဲဒၣ် ဘၣ်ဆၣ်သနာ်က့ မ့ၢ်လၢနယူဆီၣ်သ်ဝံဒီးခွံစလဲကီၢ်စဲၣ်အပူၤထံလုၢ်ဘၢတၢ် တၢ်ကီတၢ်ခဲကဲထီၣ်အဖၢမုၢ်အဃိ ကရၢအံၤအပှၤကတိၤတၢ်ပၢစံးဝဲဒၣ်လၢ တၢ်ဘိးဘၣ်ရၤလီၤတၢ်ဖံးတၢ်မၤဖဲတၢ်အိၣ်သးဒ်သိးအံၤအဆၢကတီၢ်န့ၣ် ဒုးအိၣ်ထီၣ် တၢ်ပဲၤအၢပဲၤသီသ့ၣ်တဖၣ်န့ၣ်လီၤ။
ပှၤထီဒါတၢ်ပၣ်တံၣ် အပှၤကတိၤတၢ်ပၢ ဘြဲန်ဒဲ အိခီနၢၣ် စံးဝဲဒၣ် ဘၣ်ဃးတၢ်ကမၤလဲၢ်ထီၣ်အါထီၣ်တၢ်ဒီသဒၢဝဲၤကျိၤအဂံၢ်အဘါအံၤ ဘၣ်တၢ်သးလီၤပလိာ်ဆၢတဲာ်တ့ၢ်အီၤလၢအပူၤကွံာ်တနံၣ်အခါလံ ဒီး တၢ်ဖံးတၢ်မၤအံၤကကဲထီၣ်လၢဆူမဲာ်ညါ ၁၈နံၣ်မးဘၣ်ဆၣ် ကိတိာ်ခိၣ်ကျၢၢ်ဘိးဘၣ်သ့ၣ်ညါလီၤအီၤဖဲတၢ်ဆၢကတီၢ်ဘူးထီၣ်လၢ တၢ်ကမၤထံကီၢ်ဒီဘ့ၣ်တၢ်ဃုထၢအခါန့ၣ်လီၤ။
ဖဲ ၂ဝ၁၆နံၣ်အခါန့ၣ် ပဒိၣ်ဆၢတဲာ်ပာ်လီၤလၢ ၂ဝ၂ဝနံၣ်ဒီး ၂ဝ၂၁နံၣ်အတီၢ်ပူၤ ကမၤအါထီၣ်သုးအနီၣ်ဂံၢ် ဘၣ်ဆၣ်သနာ်က့ တၢ်ပညိၣ်အံၤ လၢပှဲၤထီၣ်ဒၣ်ထဲ အမျးကယၤ ၉ဝန့ၣ်လီၤ။
ကၠဲၣ်ကံၤ လါမ်ဘံ လၢအမ့ၢ်သုးလီၢ်လံၤတဂၤဒီး မ့ၢ်စ့ၢ်ကီး ကိတိာ်ဖဲ ထဲးစမ့နံယါကီၢ်စဲၣ်အပူၤတဂၤ တူၢ်လိာ်မုာ်ဝဲဒၣ် တၢ်ကမၤအါထီၣ်သုးဖိအနီၣ်ဂံၢ်အံၤန့ၣ်လီၤ။
ဒ်န့ၢ်အသိး ပှၤထီတၢ် လ့ၣ်ဘၢၣ်ပၣ်တံၣ် ကရၢခိၣ် အဲန်ထိနံ အဲလ်ဘနံး စံးဝဲဒၣ် အဝဲသ့ၣ်ပၣ်တံၣ်မ့ၢ်ကဲထီၣ်ပဒိၣ်န့ၣ် ကဆဲးမၤအါထီၣ်ဝဲဒၣ် တၢ်ဒီသဒၢဝဲၤကျိၤ အတၢ်လၢၤဘူၣ်လၢၤစ့သ့ၣ်တဖၣ် စ့ၢ်ကီးန့ၣ်လီၤ။
