Cov neeg paub tshuaj ntsuam txog fab nyiaj txiag tau hais kom sawv daws yuav tsum tau kub siab los npaj thiab tswj kom tau koj cov nyiaj super thiab kom txhab nyiaj los yog tso nyiaj ntxiv rau koj cov nyiaj super kom thiaj tau nyiaj txaus rau koj siv rau thaum koj so tsis ua hauj lwm.
cov kev mus txheeb xyuas Australia cov Financial Services tej tuam txhab nyiaj thiab cov nyiaj superannuation no ces lawv yeej txhob txwm mus txheeb xyuas seb puas muaj kev dawb huv qhia qhov tseeb thiab seb tej tuam txhab super industries no puas coj tej nyiaj mus nqes peev lagluam kom tau txais txiaj ntsim ntau tshaj plaws rov qab los rau cov consumers los yog cov members xwb.
Yog tham txog cov nyiaj superannuation ntawd ces yeej tseem muaj neeg Australian coob heev uas yog cov hluas thiab cov neeg tsiv teb tsaws chaw tuaj pib lub neej tshiab hauv teb chaws Australia no tseem tsis tshua totaub zoo txog cov superannuation system thiab tsis pom txog qhov tseem ceeb ntawm cov kev los npaj seb yuav tswj thiab nqes peev li cas, kom thiaj tau nyiaj txaus tseg tos cia tau siv rau lub caij lawv so tsis ua hauj lwm ntawd, kom muaj peev xwm ua tau lub neej raws li qhov lawv xav ua.
MySuper account ces yog ib cov super account uas tsoom hwv Australia tau teeb tsa rau ntawm lub koom haum los qhia cov Moneysmart txog ntau yam cuam tshuam txog nyiaj txiag rau pej xeem Australia kom lawv paub thiab txhob raug neeg phem dag ntxias lawv.
Ms. Eva Scheerlink uas yog tus coj ntawm lub koom haum the qhia tias Australia cov super funds system yeej pab tau cov tub koom siab zoo kawg lawm, tab sis nws cia siab tias tom qab Royal Commission mus txheeb xyuas tag lawm, nws yuav hais kom txwv txhob pub sau cov nqe financial services los yog txhob pub tsub cov se (fees) kim tshaj qhov tsim nyog. Thiab Ms. Scheerlink los yeej pom zoo nrog pab nom Labor lub tswv yim yuav los pab kom tej poj niam tau cov nyiaj super sib npaug li txiv neej thiab yog tias nws yeej kev xaiv tsa los ua tus tsoom hwv thiab tom ntej no.
Vim rau qhov tam sim no tej poj niam uas so tsis ua hauj lwm lawm tseem tau cov nyiaj no txog li ib nrab ntawm tej txiv neej tau xwb. Yog li yog tias pab nom Labor los pab them cov nyiaj super rau tej poj niam los yog tej txiv neej txog li 160,000 tus neeg uas so los tu thiab yug me nyuam ces yuav pab kom lawv tau cov nyiaj super no ntau tuaj ntxiv thiab.
Commissioner Kenneth Hayne at the royal commission - AAP Source: AAP
Australia muaj 3 hom super tseem ceeb xws li cov industry superfunds uas yog cov non-profit thiab tej nyiaj khwv tau los tsuas coj los pab rau cov tub koom siab xwb, hom no muaj pej xeem Australia siv coob txog 2 feem 3 diam. Hos hom 2 yog cov retail super uas muaj neeg siv txog 1 feem 3 thiab yog cov tuam txhab nyiaj thiab tej tuam txhab muag nyiaj tuav pov hwm (insurance) yog cov tswj, hos hom 3 yog cov self-managed super funds uas tej neeg ntiag tug ua cov tswj thiab coj lawv tej nyiaj super mus nqe peev lagluam raws li qhov lawv xav tau.
Dr. Rosalie Degabriele uas yog ib tug zes kais qhia txog fab nyiaj txiag ntawm txhooj faj lwm (tsev kawm qib siab) University of Technology ntawm nroog Sydney qhia tias, yog koj lub tuam txhab super funds ntawd sau cov nqe (fees) tshaj 2% lawm ces tej zaum koj them kim heev lawm, vim rau qhov tej nyiaj nqes peev tsus khwv tau cov nyiaj tsam txog li ntawm 4% mus txog rau 5% xwb. Yog li thiaj xav kom tej neeg kub siab los xyuas kom tau them cov fees txog li 2% los yog kom tau them tsawg tshaj ntawd thiaj zoo, yog kim tshaj ntawd lawm ces tsis tsim nyog koj them lawm.
Martin Fahey uas yog tus coj ntawm lub koom haum tau qhia tias cov kev muaj ntau hom super funds no kuj zoo, vim lawv muaj peev xwm xaiv tau, tab sis qhov tseem ceeb kuj ua rau tej neeg muaj ntau phau super account, ua rau lawv tau them cov nqe ntau ces lawv yuav tau cov nyiaj super tsawg thaum lawv so tsis ua hauj lwm lawm thiab.
Tab sis nws xav kom sawv daws xav tias cov nyiaj no yog ib cov kev nqes peev lagluam 40 xyoo diam, uas tej neeg yuav tsum kub siab los npaj thiab tswj los yog txheeb xyuas kom coj tej nyiaj no nqes peev rau yam lawv xav nqes peev thiab muas tej nyiaj tuav pov hwm haum raws li qhov lawv xav tau kom thiaj khwv tau nyiaj ntau ntxiv cia tseg tau siv rau lub caij so tsis ua hauj lwm lawm.
Tam sim no ces txhua tus neeg ua hauj lwm yeej muaj cai tau cov nyiaj super 9.5% ntawm tej nyiaj uas lawv khwv tau ib plua, 2 plua los yog ib hlis ib zaug ntawd coj mus khaws cia rau lawv cov super account. Txhua tus neeg muaj cai ua tau hauj lwm hauv teb chaws Australia ntawd ces yeej muaj cai tau cov nyiaj super no thiab lawv tseem muaj peev xwm thov tau thiab nqa tau cov nyiaj no nrog lawv rov qab mus tsev rau lub teb chaws lawv tuaj ntawd thiab.
Lub koom haum The Australian Council of Trade Union (ACTU) tus coj Sally McManus kuj tau qhia tias tam sim no Federal Court tau tsim thiab kho dua tsab cai tshiab tso cai rau cov neeg ua hauj lwm muaj cai siv ib tsab cai tshiab mus hais lawv tus tswv lagluam kom yuav tsum them tej nyiaj tsim nyog lawv khwv tau thiab them tej nyiaj super uas tej tswv lagluam tsis tau them rau lawv ntawv rov qab rau lawv tom qab tau muaj cov kev tawm tsam Changes the Rules lso tau tshaj 10 tawm lub xyoo.
Saib tau cov kev tawm tsam uas tau txais kev txhawb nqa los ntawm Sally McManus uas yog tus coj lub koom haum ACTU tau ntawm no:
Nom tswv Australia yeej muaj cai tswj kom tej tuam txhab lagluam no yuav tsum them cov nyiaj super 9.5% rau tej neeg ua hauj lwm thiab mam li yuav nce kom ntau tuaj ntxiv ua 12% rau tom ntej no.
Ian Fryer uas yog tus coj ntawm lub koom haum uas teeb txheeb thiab tshawb fawb txog cov nyiaj superannuation thiab sab laj tawm tswv yim txog cov nyiaj super no tau hais tias, yog cov tuam txhab super funds ntawd loj npaum li cas ces lawv yuav muaj peev xwm khwv tau cov nyiaj tsam zoo tshaj plaws xwb, vim rau qhov muaj yog muaj cov neeg ua hauj lwm uas tau cov awards rate los yog cov enterprise bargaining agreement uas ua rau lawv khwv tau nyiaj zoo dua thiab muaj peev xwm tso tau nyiaj ntxiv rau lawv tej nyiaj super ntau dua ces thiaj ua rau tej tuam txhab no muaj nyiaj ntsuab ntau coj los siv nqes peev lagluam dua cov super funds me.
Fryer hais tias cov nyiaj tau ntawm super funds yeej raug coj mus nqes peev ntau yam, tsis hais cov hauv paus txhim kho (infrastructure), vaj tse, shares, bonds thiab nyiaj ntsuab xwb.
Dr. Rosalie Degabriele ntawm tsev kawm qhib siab Univesity of Technology Sydney hais tias xav kom tej neeg xaiv cov kev nqes peev lagluam nyob tus tsis muaj teeb meem ntau thiaj tsis poob nyiaj ntau, vim yog ib cov kev nqe peev lagluam ntau xyoo lub xyoo. Vim tej nyiaj super ib nrab (50%) twb raug coj mus nqes peev lagluam rau cov stock market thiab cov lagluam no yeej nce thiab nqe rau txhua txhua 10-15 xyoos twg ib zaug twg. Yog tias koj nqes peev rau cov high-risk investment es muaj hmoob koj kuj yuav tau nyiaj tsam txog li 15-20%, tab sis yog tej stock market poob ces koj kuj yuav poob nyiaj txzog li 10-15% thiab. Yog li thiaj xav kom tej neeg sawv daws xaiv cov conservative investment option kom thiaj tsis muaj teeb meem dab tsi ntau rau lawv.
Tsis tas li no los tsoom hwv Australia yeej tso cai rau tej neeg tso tau nyiaj pre-tax salary sacrifice ntxiv rau lawv cov nyiaj superannuation ib xyoo twg txog li AUD 25,000 thiab.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes los yog mloog tau ntawm tuaj koom ua tub koom siab thiab koom mloog tau tau ntawm #SBSHmong lub Facebook page tau.
