Xov xwm luv tshaj tawm hnub zwj Feej (Wednesday news 04.09.2024):
Australia tej lagluam vaj tse tseem yuav raug lub koom haum National Housing Supply and Affordability Council los txheeb xyuas. Susan Lloyd-Hurwitz uas yog tus coj lub koom haum no thiaj yuav los qhia txog nws cov kev txhawj xeeb txog lub teb chaws no cov teeb meem vaj tse thiab cov kev muaj peev xwm ntiav/yuav tau tsev nyob rau lub caij nws yuav los nrog lub koom haum nthuav xov xwm haiv tham hnub tim 4 lub 9 hli ntuj 2024 no.
Russia kuj tau tua foob pob rau Ukraine lub nroog Poltava ua rau muaj neeg yam tsawg li 51 leeg raug tua tuag thiab muaj neeg coob tshaj 200 leej raug mob thiab yog ib cov xwm txheej phom sij tshaj plaws rau lub caij txij lis thaum Russia tau piv tsov rog ntawm Ukraine 900 hnub los no.
Venezuela tus president Nicolas Maduro tau qhia tias nws yuav muab hnub tim 1 lub 10 ntuj los ua Christmas rau lub tsam thawj uas tab tom muaj cov kev tsis sib haum xeeb rau lub teb chaws tam sim no, tom qab tau muaj cov kev xaiv president tim 28 lub 7 hli ntuj dhau los no.
Lub koom huam Climate Council tsab ntawv cej luam kuj tau qhuas xeev Queensland tias yog ib tug ntaus thawj hlos rau Australia tej hauj lwm daws teeb meem huab cua pauv hloov, vim rau qhov tau muaj kev teeb txheeb qhia tias lub xeev no kub siab tig los siv cov renewable energy thiab ua kom tau raws li nws tej hom phiaj teeb tseg. Tsis tas li ntawd los kuj tau qhuas NSW thiab ACT tias yeej kub siab los txo tej tsheb tsis huv, thiab kuj tau qhuas South Australia thiab Tasmania cov kev tig los siv renewable energy, tab sis kuj tau tib Western Australia thiab Northern Territory tias tsis tshua kub siab txog cov renewable energy thiab tseem muaj tej hom phiaj tsis meej txog cov kev yuav los txo kom tsis txhob tso tej pas tsis huv rau tej ib puag ncig.
Tam sim no ces Elon Musk lub tuam txhab Starlink uas tsim cov satellite broadband kuj tau pom zoo ua raws li Brazil ib lub tsev hais plaub kom muab ib txhia X account kaw lawm. Thaum ntxov lub limtiam no ces lub tuam txhab no yeej tsis kam ua raws.
Tsoom fwv Ukraine hais tias nws tus nom uas saib xyuas cov kev tsim riam phom ua rog rau lub caij tseem ua rog nrog Russia thiab 3 tug nom tseem ceeb kuj tau tawm lawm. Ces Ruslan Stefanchuk uas yog tus coj tsev tsoom fwv thiaj qhia tias nws tej lwm coj mam los ua cov txheeb txog tej nom no cov kev tawm tsis ua nom.
Yog thawj zaug uas xeev Northern Territory ib pab nom tseem ceeb tau los xaiv ib tug nom uas yog neeg txum tim los ua nws tus coj. Selena Uibo uas yog ib tug poj niam neeg txum tim caj ceg neeg Nunggubuyu thiaj raug xaiv los ua tus coj ntawm lwm pab nom teb chaws.
Bangkok Post tau tshaj tawm tias Thaib lub koom haum sawv cev rau tej kws tsav dav hlau muaj kev txhawj xeeb tom qab Thaib tus qub thawj pwm tsav dhau los npaj tau ib lub tswv yim tias yuav ntiav ib co kws tsav dav hlau txawv teb chaws tuaj tsav dav hlau hauv teb chaws Thaib ib ntus.
Toui Tre News tau qhia tias tej lagluam ntiav tsev AirBNB ntawm Ho Chi Minh City ntshe yuav ua tsis tau lawv cov lagluam vim tseem raug txwv thiab hais tias yog ib cov kev ua tsis raug cai rau cov kev ntiav tsev ntau teev los yog ib ntus rau tej qhua so.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
