Cov npe BBC 100 Women no raug teeb tsa xyoo 2013 coj los teev zwm ntiaj tej tej poj niam thiab tej ntxhais uas muaj peev xwm los ua tau ib yam dab tsi tseem ceeb pab rau zej tsoom raws li tau qhia.
Lauj Khab tau qhia tias xyoo 2015 lawv twb tau hais seb nws puas rau npe mus sib tw ib zaug lawm.
Los txog xyoo 2018 no ces nws tus manager kuj qhia rau nws tias BBC rov qab xav coj nws mus sib tw dua, uas nws yeej tsis xav li tias yuav raug coj mus teev npe nrog BBC 100 Women 2018 list li vim nws xav tias xyov nws puas yog ib tug muaj peev xwm txaus tsim nyog coj mus zwm.
Tus ntxhais Hmoob nyob Los Tsuas teb no thiaj qhia tias nws zoo siab heev thiab raug muab saib rau lub sam xeeb tsim nuj uas nws tseem raug coj los teev npe nrog 100 tus poj niam thoob qab ntuj tias yog ib tug qauv zoo rau lwm tus thiab.
Lauj Khab qhia ntxiv tias peb tau txais nyiaj pab cuam los ntawm lub koom haum coj los pab cov me nyuam txom nyem kom tau kawm ntawv thiab tau xyaum thiab sib tw cov rugby no. Tsis tas li no los kuj muaj cv kev qhia txog txoj kev ua tus coj ntawm lub koom haum Lao National Women Rugby thiab uas nws yeej tau coj mus siv rau tej hauj lwm no.
Lao Khang in sport uniform-Courtesy of Lao Khang Source: Courtesy of Lao Khang
Lauj Khab qhia tias txij thaum nws tau kawm tiav thiab tau los ua hauj lwm nrog lub koom haum Lao National Women Rugby no ces nws kuj kawm tau ntau yam txog txoj kev ua tus coj. Ces nws thiaj tau coj tej kev paub thiab txuj ci uas nws kawm tau coj mus qhia, txhim kho thiab pab tej me nyuam ntawm xeev Xiengkhuang.
Twb vim yog nws tej hauj lwm nws ua tam li yog ib tug Development Officer cuam tshuam txog tej hauj lwm pab thiab qhia tej me nyuam ncaws pob rugby thiab ua tus coj no thiaj ua rau BBC kub siab txog nws heev.
Lauj Khab hais tias "Txoj kev ua tus coj tsis yog ib qho yooj yim, tab sis nyuaj heev li."
Nws qhia tias nws yog ib tug neeg uas qhib siab dav thiab nws tej lus nws hais ntawd tsis yog yuav yuam kom lwm tus mloog los sis lwm tus yuav tsum tau ua raws qab, tab sis tsuas yog ib cov tswv yim ib cov kev taw qhia kom tej hluas pom qab ces lawv mam ua tus xav thiab tus txiav txim tias seb puas tsim nyog yuav ua raws xwb.
Txoj kev ua tus coj ces yeej muaj ib txhia nyiam yus, ib txhia tsis nyiam los sis tib thiab hais ub hais no rau yus. Txawm yog yus tej viv ncaus kiag los qee zaus yeej tsis sib haum thiab. Txawm li cas los Lauj Khab hais tias nws tsuas muaj tej no coj los ua ib co sob kawm coj los qhia thiab kawm kom nws txawj thiab nws paub ua ib tug thawj coj zoo tshaj qhov qub ntxiv xwb.
Lauj Khab hais tias nws kawm tau ntau yam tom qab uas tau kawm tiav qib ib los ua tus lees kais qhia cov kws qhia uas hauv Nplog teb tsam sim no tsuas muaj cov qhia thiab ua hauj lwm li no txog 3 leeg xwb.
Lao Khang and her team with Asia Rugby-Courtesy of Lao Khang Source: Courtesy of Lao Khang
Nws lub luag hauj lwm yog los qhia thiab sab laj tawm tswv yim nrog rau 48 tus kws qhia kom lawv txawj mus qhia tej hluas sib tw, thiab tsuas muaj caij nyoog ib hnub ib teev tom qab lawv kawm ntawv tag los qhia lawv ncaws pob rugby xwb.
Ms Khang hais tias txij thaum nws kawm tiav ces nws yeej tau ua hauj lwm nrog lub koom haum . Yog li nws thiaj xav rau siab ua nws txoj hauj lwm kom zoo li zoo tau thiab kom kawm tau ntau yam zoo los pab nws kom nws thiaj li muaj peev xwm coj mus qhia thiab mus pab rau tej hluas phaum tshiab ntxiv dua ntawd lawv tej kev kawm txuj lawm. Tab sis nws yeej tseem npaj siab ntsoov tias muaj ib hnub twg rau yav pem suab yeej tseem xav rov qab mus kawm kom siab tshaj no ntxiv thiab.
Lao Khang is on the field with her rugby students-Courtesy of Lao Khang Source: Courtesy of Lao Khang
Nws qhia ntxiv tias Hmoob tej hluas uas kawm ntawv siab feem ntau kawm tiav los yeej nyob nroog xwb yeejt sis tshua coj lawv tej txuj ci thiab kev txawj ntse mus qhia los yog coj mus pab txhim kho tej yaj sab, uas yog tej yam uas nws xav kom yuav tsum tau hloov.
Lauj Khab tau qhia rau tias txawm tias nws raug teev zwm npe nrog BBC 100 Women 2018 list lawm los nws tseem yuav tau ua ntau yam txuas ntxiv kom phim lub meej mom lawv tau muab rau nws no.
Chee Thao kuj yog ib tug hluas Hmoob nyob teb chaws Australia uas tau mus sib tw sawv cev rau Nplog pab thiab.
Chee Thao, a Hmong Australian young man plays representing Lao National Men Rugby at the Asian Rugby Champhionship Division 3-Courtesy of Chee Thao Source: Courtesy of Chee Thao
Ms Khang tau qhia tias 2 hnub dhau los nkawv kuj tau sib tham me ntsi, thiab xav kom Chee pab qhia nws pab poj niam kom lawv thiaj muaj peev xwm mus sib tw hauv tuam ceeb Vientiane ua ntej Chee yuav rov qab los rau teb chaws Australia rau lub ib hlis ntuj ntawd.
Lauj Khab kuj qhia tias nws kuj yog ib tug neeg sib tw rau Nplog pab Lao National Women Rugby team uas lawv tau sib tw rau xyoo 2016 dhau los thiab nws kuj tau mus qhia cov rugby rau tej hluas ntawm Xiengkhuang thiab.
Lauj Khab xav ua tsaug rau txhua leej txhua tus uas txhawb nqa nws dag zog thiab dej siab dej ntsws thiab tau nrog nws zoo siab rau cov kev raug teev zwm npe nrog BBC 100 Women 2018 no, uas nws yeej tsis xav li tias yuav muaj peev xwm txaus tsim nyog coj nws lub npe coj mus teev zwm nrog 100 tus poj niam hauv ntiaj teb uas muaj peev xwm thiab yog ib cov qauv zoo ntawd li.
Nws xav qhia ntxiv tias tsis hais leej twg li txawm yog cov kev sib tw los sis cov kev ua ib yam hauj lwm dab tsi, nws yeej xav kom ua kom kawg sib kawg ntsws thaum kawg seb ho puas ua tau 100% raws li yus xav.
Ntxiv ntawd los yuav tau muaj kev cam hwm lwm tus thiab luag thiaj yuav fim thiab hwm yus.#
