Suav Phiab Thoj nyob ntawm Innisfail uas yog ib lub zos nyob chaw sov ntawm sab qaum teb xeev Queensland ntawm teb chaws Australia tau qhia tias nws ua cov lagluam cog qoob loo los tau 30 xyoo no lawm.
Thaum xub ces nws xav tias ntshe muaj hnoob nyoog lawm ces ntshe yuav kawm tsis tau ntaub ntawv lawm ces nws thiaj ua siab mus kawm thiab xyaum ua teb cog qoob loo.
Nws kuj tau mus xyaum thiab nrog cov tswv teb neeg Australia ua hauj lwm seb yuav cog thiab tu los yog tswj tej qoob li cas thiaj ntsu thiab thiaj tau nyiaj. Tom qab nws kawm tau thiab paub lawm ces kuj tau los pib xub cog tsawg ntaj ua ntej. Tab sis tom qab ua los tau ntau xyoo ces cov tsawb no kuj poob nqe, nws thiaj hloov tig los cog tsawg qe, ua yog hom tsawg qab zib me ntawd.
Txog rau xyoo 2006 ces kuj muaj kaub zeeg cua Katrina los hla lub zos Innisfails ua rau cov kwv tij Hmoob cog tsawb ua lagluam tej tsawb pua lua meem mias hauv pem teb lawm xwb thiab ua rau lawv poob peev tag feem ntau. Ces feem coob thiaj ua siab tso tseg tsis ua teb tsawb ntxiv thiab tawm mus ua hauj lwm lwm yam lawm yog tias lawv yog cov ntiav los sis xauj teb ua. Hos cov yuav kiag thaj teb ua tswv lawm ces yuav tau nyiaj ntxeem nrog tej teeb meem no thiab ua siab khwv thiab rov qab pib dua tshiab.
Suav Phiab Thoj qhia tias "Ib ob xyoos dhau los no mas kuv khwv heev nawb, tab sis koj khwv heev ces koj tau nyiaj nawb."
Raws li Suav Phiab Thoj tau qhia, nws tau los cog tsawb qe, cog qhiav daj, cog qhaj thiab qhiav nrog rau cog cov txiv nplai zaj (dragon fruit).
Nws kuj qhia tias thaum xub mas cov tsawb qe kuj tau nqe zoo kawg, ib thawm 10 kilogram xwb twb tau ze txog li AUD 50 dollars diam tab sis ntev tuaj ces muaj neeg cog coob ces kuj tsuas tau li 20 los sis 30 dollars rau ib thawv lawm xwb.
Suav Phiab Thoj kuj tau hais tias yog xav kom tsawb loj sib xws ces ib tsob tsuas yuav 2 tug tsawb xwb, tseg tus yuav txhawv thiab ib tug kaus tsawb xwb, txiav nplooj pov tseg tsuas yuav cov txiv tsawb nkaus xwb ces tsawb thiaj loj xwm yeem. Tsis tas li yuav tau siv tshuaj tua cov hauv paus tsawb uas txiav lawm kom kab txhob noj, yuav tau siv hnab roj hmab los looj qhwv tauv tsawb thaum txiv pob tsawb pov tseg ces ib cim yeej sau tau cov txiv tsawb 3 phaum diam. Txuas ntxiv nawd nws kuj pab nws tus tub hlob ua ib daig thiab ces nws thiaj ua 2 daim teb tsawb diam.
Nws kuj yog tus ua tau cov tsawb zoo nkauj thiab ua tau ntau muaj xa muag rau tej kiab khw ntau lub xeev hauv Australia.
Ntxiv ntawd nws kuj cog qhia daj thiab cov qhia qhaj thiab tej qhiav noj ib xyoo ib cim li ib hectare ntawd ntxiv thiab.
Tsis tas li no los nws tseem cog cov txiv nplai zaj thiab. Muaj hom liab paj yeeb ntshav, hom dawb thiab hom daj. Hom daj mas tsw ha thiab ntxiv qab tab sis txi tsis ncws li 2 hom dawb thiab liab ces nws thiaj cog 2 hom no ntau dua.
Suav phiab Thoj tau qhia ntxiv tias ib xyoos twg cov txiv nplai zaj no txi tau txog li ntawm 15 tons diam. Nws tsuas xa cov txiv no muag rau Australia 2 lub nroog loj li Sydney thiab Melbourne xwb vim Brisbane ces muaj neeg cog tau muag lawm.
