Tsim vaj tse kom ntau ntxiv ntawm Sydney

Tau muaj ib co kev cej luam tshiab tau nqua hu kom tso tseg tej infrastructure projects thiab tib los pab tsim vaj tse kom ntau tuaj ntxiv ntawm Sydney..,

Xov xwm luv Credit: SBS/Max Banyat

Xov xwm luv tshaj tawm hnub zwj Feej (Wednesday news 11.09.2024):

Ntau lub teb chaws vam meej li Meskas, Fabkis, Askiv thiab Germany tau rau txim tshiab rau teb chaws Iran suav cov kev rau txim tsis pub nws lub tuam txhab Iran Air ya mus rau Askiv thiab Europe vim hais tias Iran pab tej foob pob rau Russia siv tawm tsam Ukraine.

Hnub no (11.09.2024) ces Federal Court yuav los txiav txim rooj plaub uas tus nom xeev ywj pheej Alex Greenwich tau coj Mr Mark Latham uas yog tus coj ntawm xeev NSW pab nom One Nation coj mus hais plaub cuam tshuam txog nws ib co lus sau rau hauv nws phau Twitter account.

Hnub tim 11.09.2024 sij hawm 11 am AEST ntawm Australia ces kuj tau muaj cov kev sib teev theev txog tej laj fai kum xeeb thiab tej cai los yog tej hauj lwm ntawm Mekas 2 tug nom uas yog Meskas tus lwm coj Kamala Harris thiab Meskas tus qub nom Donald Trump dhau los uas yuav los sib tw seb leej twg yuav yeej los ua Mekas tus President tshiab 2024 no.

Kuj tau muaj ib tsab ntawv cej luam ntawm lub koom haum Productivity and Equality Commission tau nqua hu kom tsoom fwv xeev thiab tsoom fwv teb chaws tso tseg tsis txhob siv tej nyiaj coj mus ua nau cov infrastructure projects thiab siv tej nyiaj no coj los tsim vaj tse kom ntau tuaj ntxiv ntawm Sydney.

Tau muaj ib cov kev tshuaj ntsuam nrog tej hluas ntau tshaj 5,000 tus hluas hnoob nyoog 14 txog 17 xyoo uas nto nkauj nto nraug uas tau coj mus nthuav tawm ntawm phau ntawv xov xwm Australian and New Zealand Journal of Public Health tau txheeb tau tias tej tej zaum tej hluas uas haus luam yeeb pa yuav muaj cib fim yam tsawg li 5 npaug los pib haus luam yeeb tiag piv rau tej tsis haus.

Cov kev cej luam ntawm Global Methane Budget qhia tias tej methane gas yog ib co yuav ua rau muaj huab cua pauv hloov thiab dua ntawm tej carbon dioxide.

Huab tais Askiv Charles III yuav tuaj xyuas Australia hnub tim 18 lub 10 hli ntuj (2024) 5 hnub uas nws thiab niam huab tais Camilla yuav mus xyuas Canberra thiab Sydney.

Poland tsis pom zoo rau Germany lub tswv yim yuav muab ciam teb kaw 6 hli tom qab tau muaj tej xwm txheej ib tug neeg thoj nam Syrian xuas riam nkaug neeg.

Tau muaj Ukraine ib cov kev tawm tsam Moscow thiab sab hnub poob ntawm Russia ua rau ib tug poj niam raug tua tuag thiab ntau caum lub tsev raug puas tsuaj thiab tau muab 3 lub tshav dav hlau tseem ceeb kawm. Russia hais tias nws tau tua tej drones 20 lub thiab 70 lub ntawm cheeb tsam Bryansk.

Tsoom fwv Australia qhia txog nws cov kev los txheeb tsab cai tiv thaiv kom tej neeg tsis txhob txov txo tus kheej txoj sia uas yuav siv tej tswv yim nthuav dav thiab ua tib zoo xyuas kom tej neeg Australia tau siv cov kev pab cuam raws li qhov tsim nyog tau siv.

Bangkok Post tau qhia tias nom tswv Thaib tseem yuav sab laj lub limtiam tom ntej no thiab hnub tim 20 lub 9 hli ntuj 2024 no yuav pib faib cov nyiaj 10,000 Baht digital wallet rau pej xeem Thaib tshaj 14 million tus.

Aden Thao tau yeej cov kev sib tw 2024 BRIC SuperBike Championship yeej zeeg 1 ua zaum 2 thaum sib tw ntawm lub tshav sib tw Chang International Circuit ntawm xeev Bouriram teb chaws Thaib.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.