Cov ntsiab lus tseem ceeb ntawm zaj xov xwm no:
- Yeej muaj cov visa no 3 hom xws li-ua hauj lwm luv luv xwb, ua haum lwm ntev txog theem nrab-thiab tuaj ua hauj lwm raws cov kev pom zoo ntiav dag zog uas nom tswv Australia tau pom zoo nrog lwm lub teb chaws tej nom tswv.
- Cov lagluam uas muaj cai yuav tos tau ib tug neeg paub ua hauj lwm txawv teb chaws tuaj ua hauj lwm ntawm teb chaws Australia yuav siv sij hawm li ntawm 5 hnub seb thov puas tau cov visa no.
- Cov neeg muaj cai thov tau cov Temporary Skill Shortage Visas no yuav tsum yog cov neeg uas twb paub ua hauj lwm lawm xwb.
Cov Temporary Skill Shortage visa (subclass 482) yeej yog ib cov pab tos cov neeg txawv teb chaws tuaj ua cov hauj lwm ntawm teb chaws Australia tau yog tias tej tswv lagluam tsis muaj peev xwm yuav rhiav tau tej neeg Australia uas paub ua tau tej hauj lwm ntawd ntawm teb chaws Australia no lawm.
Judit Albecz yeej yog ib tug neeg paub zoo txog cov hauj lwm tsiv teb tsaws chaw thiab kuj yog ib tug coj kws lij choj ntawm lub tuam txhab AJ Legal Australia. Nws hais tias yeej muaj 3 co txheej txheej thaum tos ib tug neeg ua hauj lwm txawv teb chaws tuaj ua hauj lwm ntawm teb chaws Australia.
Xub thawj ntawd ces ib tug tswv lagluam twg yuav tsum ua ntaub ntawv thov tos ib tug neeg.
Yeej muaj cai teev tseg tias lub tuam txhab lagluam uas xav tos ib tug neeg txawv teb chaws tuaj ua hauj lwm ntawm teb chaws Australia ntawd yuav tsum yog ib tuam txhab uas yeej tau teeb tsa raug kev cai thiab yeej tseem ua luam tam sim no, tsis tas li no los yuav tsum yog lub tuam txhab ntawm tseem yuav tsum yog lub tuam txhab zoo thiab yoog ua raws li Australia tej cai tswj cov kev tsiv teb tsaws chaw thiab ntiav dag zog ntxiv thiab.
Tus nqe thov tos ib tug neeg txawv teb chaws tuaj ua hauj lwm ntawm teb chaws Australia no tsuas raug nyiaj AUD 420 xwb, thiab tus neeg ntawd muaj cai ua tau hauj lwm txog li 5 xyoos suav txij li hnub nom tswv tso cai rau nws tuaj tau.
Txawm li cas los ib lub tuam txhab twg yeej muaj peev xwm ras los ua lub tuam txhab muaj cai tos tau tej neeg no yam tsis tas them nqe dab tsi ntxiv thiab muaj peev xwm txo tau lub sij hawm thov cov Temporary Skill Shortage Visa no rau lub sij hawm li 5 hnub xwb ces kuj thov tau lawm thiab.
Theem ob txuas ntxiv ntawd ces yog yuav los xaiv tus neeg uas xav tos tuaj ua hauj lwm.
Cov kev xaiv ib tug neeg no yog thaum uas tus tswv lagluam uas muaj cai tos tau tus neeg txawv teb chaws tuaj ua hauj lwm ntawd xaiv ib tug neeg tuaj ua ib txoj hauj lwm.
Txawm li cas los tej zaum lub tuam chav tswj cov laj fai tsiv teb tsaws chaw kuj yuav nug kom lub tuam txhab uas xav tos neeg txawv teb chaws tuaj ua hauj lwm ntawd yuav tsum qhia kom tau tias nws yeej tau kub siab nrhiav seb puas tau neeg Australia ua hauj lwm ua ntej tso.
Yog li ntawd, tej tswv lagluam thiaj tsim nyog yuav tau haub tau yam txoj hauj lwm nrog rau tej chaw ntiav dag zog uas tshaj xov thiab nrhiav neeg thoob teb chaws seb nrhiav puas tau tus neeg los ua txoj hauj lwm ntawd ntawm teb chaws Australia no ua ntej tso. Yog tias lawv tsis muaj peev xwm nrhiav tau tus neeg paub ua tau txoj hauj lwm ntawd tiag tiag lawm, ces mam li muaj peev xwm nrhiav kom tau ib tug neeg txawv teb chaws uas muaj txuj ci thiab paub hauj lwm tuaj ua txoj hauj lwm ntawd tau.
Getty Images/pixdeluxe
Ms Albecz hais tias theem peb thiab yog thawm kawg ntawd ces yog thaum uas tus neeg txawv teb chaws ntawd mus thov visa.
Ob tug neeg uas yog tus tswv lagluam thiab tus neeg ua hauj lwm nyob txawv teb chaws ntawd yuav tsum tau sau ntaub ntawv mus thov visa thiab muab xa mus rau lub tuam chav lis laj fai tswj dej num tsiv teb tsaws chaw.
Tab sis nws tseem xav kom ua ntej thaum yuav xa tau ntaub ntawv no mus thov visa, ces tej lagluam yuav tsum mus thov nom tswv kom lawv muaj cai tos thiab yeej lees tias tau xaiv tus neeg twg yuav tuaj ua txoj hauj lwm uas nom tswv Australia pom zoo rau nws tos tuaj tau thiab tso.
Yog tias tseem muaj teeb meem cuam tshuam txog cov kev tos thiab cov kev xiav tus neeg ua hauj lwm no thiab ces yeej yuav thov tsis tau cov visa no tos tus neeg txawv teb chaws tuaj tib yam thiab.
Tsis tas li no los tus neeg uas raug tos txawv teb chaws tuaj ntawd los yuav tsum yog cov neeg uas yeej paub ntaub ntawv thiab lus Askiv zoo raws li qhov nom tswv tau teev tseg, tsis muaj mob, thiab yog ib tug neeg zoo thiab muaj tej txuj ci paub ua tau txoj hauj lwm nws yuav tuaj ua ntaws thiab.
Lawv yuav tsum muaj peev xwm qhia tau tias lawv yeej ua hauj lwm full-time rau txoj hauj lwm lawv yuav tuaj ua ntawm teb chaws Australia tau los ntev lawm los yog tau ua txoj hauj lwm ntawd yam tsawg li 2 lub xyoos lawm. Yog tias tus neeg ntawd tseem ua hauj lwm casual xwb ces yuav tsis pub tos, tab sis yog tias nws twg ua hauj lwm part-time lawm no ces tej zaum mam xyuas seb ho puas yuav tos tau.
Getty Images/JohnnyGreig
Cov Temporary Skill Shortage visa no yeej muaj 3 hom-li tuaj ua hauj lwm ib ntus luv luv xwb, tuaj ua hauj lwm ib nyuag ntus uas nyob tau ntev me ntsis thiab cov neeg uas tuaj ua tej hauj lwm raws li tej nom tswv tau pom zoo nrog tej tswv lagluam tias pub tos tuaj ua tau ib cov hauj lwm.
Cov hauj lwm tuaj ua ib ntus luv luav (Short-t erm stream)
Koj muaj peev xwm txheeb tau tias cov visas tuaj ua hauj tej hauj lwm no yog cov hauj lwm dab tsi ntawm tau.
Raws li ib txwm paub mas lub tuam chav lis laj fai tswj cov dej num tsiv teb tsaws chaw yeej siv sij hawm li 50 hnub los txheeb cov visa no thiab yuav tau them tus nqe txog li AUD 1,265.
Hos hais txog cov uas tuaj ua hauj lwm ib ntus nrab ntawd ces ntshe ho cuam tshuam txog pej kum haiv tej cai ua luam (International Trade Obligations) ces tej neeg ua hauj lwm txawv teb chaws no yeej muaj cai ua tau hauj lwm ntawm teb chaws Australia no txog 2 xyoos. Tab sis cov visa no yuav tsis pub tej neeg tuaj ua hauj lwm thov nyob tau ruaj (permanent residency) ntawm teb chaws Australia thiab tsuas muaj cai txuas tau daim visa no tib zaug ntxiv nkaus xwb.
Cov visa uas thov tuaj ua hauj lwm ib ntus nrab (Medium-term stream)
Yog xav thov cov visa no ces tej neeg txawv teb chaws uas ua hauj lwm ntawd yuav tsum raug ib lub tuam txhab los yog ib tug tswv lagluam tos tuaj ua tej hauj lwm li tau teev tseg uas koj txheeb tau ntxiv ntawm
Tus nqe them thov daim visa no ces raug nyiaj txog AUD 2,645 thiab yuav tau siv sij hawm ze txog li ntawm 2 lub hlis mas mam li paub tias seb thov puas tau daim visa no siv.
Daim visa no yeej pub cov neeg txawv teb chaws uas paub ua hauj lwm tuaj ua hauj lwm thiab nyog tau ntev txog li 4 xyoos ntwm teb chaws Australia, thiab thaum txog caij thiab yog tias lawv muaj cai, ces lawv yeej thov tau cov permanent residency visa nyob tau ruaj ntawm teb chaws Australia no.
Hom visa Labour agreement stream
Cov visa no ces yeej tau muaj kev pom zoo ntawm tsoom hwv Australia thiab tej tswv lagluam uas ua ib cov lagluam dab tsi tsi ntsees uas yeej pom tau tias nrhiav tsis tau tej neeg txawj thiab paub ua cov hauj lwm ntawd tos tej neeg uas txawj thiab paub ua tuaj ua tej hauj lwm no.
Tej lagluam uas tam sim no tau pom zoo nrog nom tswv Australia ces yog cov lagluam mis nyuj, lagluam ntses, lagluam muag nqaij, lub tuam chav tswj cov dej num mooj kav moj coj (kev coj ntseeg), cov lagluam uas rhiav tej neeg ua hauj lwm thiab txib tej neeg ua hauj lwm rau ib lub tuam txhab lagluam twg ces tej tuam txhab lagluam ntawd mam them nyiaj rau lub tuam txhab ntawd (on-hire), lagluam yug npua, tej kiab khw noj mov uas yuav tau them tus nqe hno kim, mus txog rau cov lagluam haub tau yaum thiab lagluam cog qoob loo thiab cog tej xyoob ntoos los txhim kho zejkho zos thiab coj los siv yog cov uas yuav tos tej neeg txawv teb chaws paub ua cov hauj lwm no tuaj ua hauj lwm.
Tab sis cov visa no raug tus nqe txoj li AUD 2,645, thiab daim visa no yuav tso cai rau tus neeg thov tau daim visa no tuaj ua hauj lwm ua tau hauj lwm ntev txog li 4 lub xyoos, tab sis yeej tseem muaj tej lus zoj khi (terms and conditions) raws li cov kev pom zoo ntawm tsoom hwv thiab tej lagluam uas yuav tsum tau ua raws thiab.
Yog li tag nrho 3 hom visa no thiaj yuav tso cai rau tus neeg yuav tuaj ua hauj lwm ntawd muaj cai ntxiv nws tsev neeg npe nrog nws tuaj ua ke rau teb chaws Australia no tab sis tej neeg ntawd yuav tsum yog cov neeg tsis muaj mob dab tsi thiab yuav tsum yog neeg zoo tsis raug txim. Tsis tas li ntawd los yuav tsum tau yuav cov nyiaj tuav pov hwm tswj kev noj qab haus huv ntiag tug (Private health insurance) zoo txaus pov puag lawv vim rau qhov lawv yuav tau pov plob lawv tus kheej txhua yam nqe kho mob rau lub caij uas lawv tseem nyob ntawm teb chaws Australia no.
Yog koj xav tau xov xwm ntxiv txog cov hauj lwm no ces mus txheeb tau ntawm los yog mus xyuas tau ntxiv ntawm yog tias koj ho muaj lus nug xav nug lwm yam ntxiv.
