Raws li tau muaj xov xwm cej luam los ntawm Nplog lub chaw nthuav xov xwm uas tau tshaj tawm rau hnub tim 18.7.2018 dhau los, thiab cov xov xwm tau tshaj tawm ntawm Nplog phau ntawv xov xwm Ces Nplog lub tuam chav National Steering Committee on Human Rights tau mus koom UN Human Rights Committee lub rooj sab laj zum 123 ntawm Geneva txij hnub tim 11-12.7.2018 coj los qhia txog Nplog cov kev cej luam txog nws cov kev cam hwm thiab pov puag pej xeem txoj cai raws li pej kum haiv tsab cai uas Nplog tau pom zoo ua raws txij xyoo 2009 los.
Yog li cov nom Nplog uas muaj Nplog ib tug pwm tsav ntawm Nplog tus thawj pwm tsav lub tuam chav hauj lwm thiaj tau los cej luam txog cov hauj lwm human rights hauv Nplog teb rau UN Human Rights Committee uas muaj Kim Yuval Shany ntawm lub tuam chav los mloog Nplog cov kev cej luam no seb Nplog ua puas tau raws li UN tej cai tau teev tseg.
Raws li Nplog phau ntawv xov xwm KPL Laos News Agency tau cej luam qhia 'Nplog yeej tau tsim tau tshaj 120 tsab cai los pov puag thiab cam hwm leej tib neeg thiab nws tej pej xeem txoj cai, nrog rau tau tsim 7 tsab cai tsi ntsees los pov puag tib neeg txoj cai thiab tau tsim 2 nqe cai me ntawm 9 tsab cai human rights los pov puag thiab cam hwm tej neeg txoj cai lawm.'
Nplog cov nom tau cej luam rau tus coj UN Human Rights Committee tias, 43 xyoos dhau los no uas Nplog tau tswj hwm lub teb chaws Los tsuas no, nom tswv Nplog yeej tau ua txhua tsav yam kom txhua tus pej xeem Nplog tau txais kev thaj yeeb nyab xeeb thiab tau txais kev ruaj ntseg thiab yog tus tswv muaj txoj cai vaj huam sib luag rau fab kev lagluam kev ua lub neej thiab kev muaj feem koom rau tej laj fai kum xeeb los tswj lawv lub neej thiab lawv txoj cai.
Lub caij no tsoom hwv Nplog yeej tau ua txhua tsav yam coj los pab txhim kho kom pej xeem Nplog lub neej zoo tuaj ntxiv thiab tau txais vaj huam sib luag raws li txoj kev tswj hwm tshiab ntawm tsoom hwv Los tsuas. Tab sis vim Nplog raug pej kum haiv neeg tuaj txeeb tswj hwm thiab nam nias rau lub caij muaj tsov rog Indochina thiab Vietnam War los sis yog Secret War ntawd, thiaj ua rau Nplog tsis muaj peev xwm yuav lis tau tej dej num no kom tiav raws siab xav.
Tab sis nyob rau lub tsam thawj uas Nplog cov nom ntsib UN pawg tim tseeb tswj caij ncaj ncees rau leej tib neeg txoj cai tau hnub Nplog rau tim 11-12 lub 7 hli ntuj xyoo 2018 ntawm Geneva teb chaws Switzerland ntawd, Radio Free Asia kuj tau cej luam tias Nplog cov nom raug koom haum UN Human Rights Committe (CCPR) cov neeg koom lub rooj sablaj nug txog Nplog cov teeb meem uas nom tswv siv pej xeem tej av los txhim kho teb chaws thiab cov pej xeem Nplog li Sombat Somphone uas tau ploj hauv Nplog teb yam tsis paub ntab ntw thiab nom tswv Nplog puas cam hwm pej kum haiv txoj cai ces Bounkert Sengsomsak uas yog tus pwm tsav hauv Nplog tus thawj pwm tsav lub tuam chav kuj tsis teb tej lus nug uas lawv nug tsi ntsees tias, nom tswv Nplog puas pov puag pej xeem Nplog txoj cai tiag?, ces Nplog tus nom no tsis teb tej lus nug no ncaj qha tab sis teb lwm yam tias tsuas yog muaj ib txhia neeg tsis vam zoo txhob kom pej xeem Nplog txhob pom zoo rau nom tswv siv pej xeem tej av liaj teb los txhim kho teb chaws xwb.
Mr. Bounkert tseem tau hais ntxiv tias tsuas yog Sombat Somphone muaj teeb meem nrog cov neeg koom lagluam ces thiaj muaj teeb meem rau nws xwb, thiab nws yeej muaj teeb meem cuam tshuam txog cov kev ua tswv av hauv Nplog teb. Boukert hais tias Sombat tseem tau nyiaj txog li 1 los yog 2 million US dollars thiab tsis paub tias nws tau qhov twg los. Ntxiv ntawd tseem tau hais ntxiv tias nws tus poj niam uas yog Ng Shui Meng ntawd los yeej tsis muaj ntaub ntawv sib yuav qhia tias nkawv yog txij nkawm tiag thiab.
Raws li Radio Free Asia tau tshaj tawm rau hnub tim 02/08/2018 dhau los no, UNHCR nrog rau lub koom haum FIDH thiab LMHR ho xav txawv Nplog tus nom cov lus tau hais ntawd.
UHNCR tau qhia tias yeej txheeb tau ntau yam teeb meem thiab tau tim tsum thiab tim tsoom hwv Nplog hnyav heev txog nws tej teeb meem yuam lwm tus ploj yam tsis paub ntab ntw, txwv tsis pub tawm tau tswv yim ywj pheej thiab tsis pub sib sau ua ke tawm tsam tau, cia li muaj pej xeem txhom yam tsis muaj pov thawj tim khawv dab tsi, rau txim hnyav rau tej pej xeem mus txog rau cov kev tso rau rau pej xeem xaiv nom ywj pheej thaib cov kev tsis cam hwm cov neeg pawg tsawg.
2 lub koom haum International Federation for Human Rights (FIDH) and the affiliated Lao Movement for Human Rights (LMHR) tau sau ib cov ncauj lug txog Nplog cov human rights tias:
“Tej teeb meem uas United Nations (UN) txheeb tau cuam tshuam txog leej tib neeg txoj cai no qhia tau tias lub teb chaws no tseem coj nruj tsiv thiab tsis cam hwm nws tej pej xeem txoj cai ua neej, tsis cam hawm lawv txoj cai rau cov laj fai kum xeeb li.”
Lub koom haum FIDH los kuj pom zoo tib yam li Nplog lub koom haum LMHR los kuj tau hais tias "UN cov kev txheeb tau Nplog cov teeb meem human rights no yog tej yam qhib pej kum haiv tej tsoom hwv qhov muag kom pom txog Nplog cov kev tsis cam hwm leej tib neeg txoj cai lawm".
Debbie Stothard uas yog FIDH tus coj los kuj tau hais tias " tsis muaj lwm txoj xub ke rau pej kum haiv tej neeg zejzog ua txoj ua ntsej lag muag dig tsis paub tsis pom thiab tsis kub siab los ua dab tsi tsub nias Nplog cov kev tsis cam hwm leej tig neeg txoj cai tau ntxiv lawm".
Txawm nom tswv Nplog tau txais pej kum haiv tej nyiaj pab cuam ntau heev los ntawm ntau lub teb chaws li Japan, Australia, Germany, Asian Development Bank (ADB) thiab World Bank’s International Development Association thiab tam sim no Suav tuam tshoj (China) yog tus pab nyiaj ntau zuj zus tuaj rau Nplog lawm los zoo li nom tswv Nplog yeej tsis cam hwm thiab yeej tsis kub siab lis tej laj fai kum xeeb los pov puag thiab cam hwm nws tej pej xeem txoj cai human rights li.
"Thiaj txog caij lawm ua pej kum haiv tej tsoom hwv yuav tau tsub nias tsoom hwv Nplog kom kub siab los tsim cai thiab nqes tes siv tej cai no kiag thiab hloov nws cov kev tswj hwm kiag tam sim no, tsis lis ntawd ces tsis txhob pab tej nyiaj pab cuam rau Nplog txhim kho nws lub teb chaws ntxiv lawm," raws li Vanida Thephsouvanh uas yog tus coj ntawm Nplog lub koom haum LMHR tau hais.
Phil Robertson uas yog tus lwm coj ntawm lub koom haum Human Rights Watch ntawm sab teb chaws Asia hais tias:
"Nom tswv Nplog yeej siv txhua txoj xub ke los lug hla kom txhob tau teb UN tej lus nug uas lawv pheej nug tias "muaj dab tsi tshwm sim thiab ua li cas rau Sombat Somphone lawm, nws dua twg lawm, puas yog nws raug tua tuag lawm thiab yog nws tuag lwm no ne nws lub cev ho nyob qov twg kiag" no.
Ntxiv ntawd kuj tau muaj ib tug neeg teeb txheeb ua hauj lwm hauv Nplog los tau 10 lub xyoo no los kuj tsis xav qhia kom leej twg paub tias nws yog leej twg kuj tau hais ntxiv tias "Puas yog pej xeem Nplog tseem raug txim kaw tsev laj cuj vim lawv tsis pom zoo muab lawv tej av thiab liaj teb rau tsoom hwv Nplog siv los txhim kho teb chaws, thiab vim li cas ho muab lawv kaw, yog li cov kev yuam tej pej xeem no thiaj tsis yog cov kev tuaj yeem los yog yeem pom zoo nrog nom tswv."
Nyob rau tib lub caij no, lub koom haum Hmoob ntiaj teb tsoom theej tswj thiab lub koom haum sawv cev rau cov neeg tsis muaj tebchaws thiab cov neeg pawg tsawg los kuj tau coj America ib tug nom hauv tsev tsoom hwv qes (Tsev keeb theem tswj qes-House of Representative) hu ua Tom Garrett tsab ntawv tawm tswv yim thiab nws cov ncauj lug coj los nrog daws Nplog cov teeb meem tseem yuam tej cai human rights hauv Nplog teb thiab tseem tawm tsam nrog cov Hmoob Caubfab pem hav zoov ntawm sab qaum teb ntawm teb chaws Nplog kom cia li tso tseg tej teeb meem no thiab tig los cam hwm leej tib neeg txoj cai ncaj ncees thiab sib khom nrog cov Hmoob no los daws thiab xaus tej teeb meem no.
Tom Garrett uas yog America tus nom sawv cev rau pej xeem ntawm tsev keeb theej tswj qes tau hais ib cov lus tias:
" Teb chaws America muaj ib txoj dej num yuav tau sawv ua ib nqag nrog America tej phooj ywg thoob ntiaj teb rau lub caij tau lis tej dej num peeb zeej ua ke thiab tom qab lis tej dej num no tas tib si. Hmoob yeej tau qhia meej tseeb lawm tias lawv yog cov neeg muaj peev xwm thiab ua siab ncaj rau teb chaws America, thiab tsis yog America yuav cia li cia lawv raug lwm tus tawm tsam vim lawv tau muaj feem pab haiv neeg America no. Yog li kuv thiaj cia siab tias tsab cai H.Res 992 no yuav qhia txog tej zwj ceeb phom sij puas ntsoog txog Hmoob, thiab Congress yuav muaj peev xwm los nrog xyuas tej tswv yim los kho thiab daws tej teeb meem no pab rau cov neeg Hmoob."
Yog li thiaj tau muab tsab resolution no coj mus fi rau US House Committee uas tswj thiab lis tej dej num pej kum haiv
(Foreign Affairs) uas muaj lub ntsiab qhia txog tej xwm txheej dhau los uas tau ua rau ntau tus Hmoob txawv teb chaws nrog rau cov neeg Hmoob thoj nam uas tau rov qab mus nyob Nplog teb tau mus ploj thiab tas txoj sia yam tsis hnov ntab ntw hauv Nplog teb, mus txog rau tej lus iab liam tias nom tswv Nplog tau xa tub rog mus tua thiab tawm tsam cov Hmoob caub fab pem hav zoov, thiab tej lus tau nqua hu kom nom tswv Nplog tso tseg tej dej num no thiab thim nws tej peeb zeej rov qab. Ntxiv ntawd America tus nom Tom Garrett no tseem tau nqua hu kom koom haum nraj nrig tim koom haiv lub tuam chav tswj thiab pov puag leej tib neeg txoj cai ncaj ncees (UN Human Rigts Commission) txib ib pawg neeg mus tshuaj ntsuam xyuas cov teeb meem tseem sib cov nyom tau muaj ntawm 2 tog nom tswv Nplog thiab cov Hmoob hav zoov hauv Nplog teb thiab.
Thaum ntxov rau tim 05 lub 7 hli ntuj xyoo 2018 no, lub koom haum UNPO nrog rau CWHP thiab tej neeg tshaj xov xwm, nrog rau cov neeg nrhiav xov xwm, cov neeg tsim yeeb yaj duab thiab cov neeg sau ntawv uas tau mus ua tim khawv pom cov teeb meem Nplog tsis cam hwm thiab tseem yuam tib neeg txoj cai ncaj ncees no tau koom sau ib tsab ntawv xa mus rau tsoom coj tseem ceeb ntawm lub koom haum European Union (EU) xws li tus pwm tsav lis laj fai pej kum thiab tswj kwv ruaj ntseg, EU lub tuam chav tswj thiab pov puag leej tib neeg txoj cai nrog rau EU lub tsev tsoom hwv hais kom lawv nqua hu kom Nplog yuav tsum cam hwm leej tib neeg txoj cai vaj huam sib luag uas cam hwm Hmoob lub meej mom nrog tib si rau lub caij thaum UN cov neeg ntsib thiab koom sab laj nrog Nplog cov nom sawv cev ntawd.
Nybo rau tib lub caij no los kuj tau muaj lub koom haum United Hmong Vision uas yog Dr. Lee Pao Yang los kuj tau nrog nws tus kws lij choj tau coj Hmoob cov teeb meem no mus hais hauv UN Human Rights Concil kom tau txais kev ncaj ncees rau cov Hmoob uas raug Nplog tua los tau ntau caum xyoo, kom yuav tsum hais kom pej kum haiv nrog hais cai kom cia Hmoob tswj Hmoob lub neej lawm xwb Hmoob yuav nrog Nplog nyob tsis tau ua ke ntxiv mus lawm vim Nplog tsis hlub Hmoob tam li pej xeem thiab tau tua Hmoob los tau 40 tawm lub xyoo no, tab sis nom Nplog yeej tsis lees paub tias muaj tej teeb meem no tshwm sim li tau iab liam tiag.
UN tseem tau txhawj xeeb txog Nplog tej pej xeem cov kev tsis muaj cai tawm tau tswv yim los yog tib tsis tau tsoom hwv Nplog ib qho dab tsi kiag li, tsis muaj cai sib sau tawm tsam yam thaj yeeb uas rau pej xeem tsis muaj peev xwm siv lawv txoj cai raws li qhov tsim nyog, tsis muaj peev xwm los txhawb nqa cov kev cam hwm leej tib neeg txoj cai vim ntshais tsam nom tswv raug txim los yog tawm tsam lawv.
Tsis tas li no UN tseem txhawj xeeb thiab tias, Nplog tej kev muab tej neeg kaw rau tej tsev laj cuj neeg coob sib txiv qev, , ua phem rau tej neeg raug txim thiaj muaj tej neeg raug txim tau tas sim neej rau lub caij tseem raug txim vim tsis tau zaub mov noj txaus, tsis kub siab tu saib xyuas kom cov neeg raug txim tau txais kev kho mob pub rau lawv raws li qhov tsim nyog los yog muab tej neeg no kaw tsev laj cuj ntev heev ntawd.
UNHCR tau tshab ntxiv tias nws txhawj txog nom tswv Nplog cov teeb meem cov nyom cuam tshuam txog cov kev txeeb pej xeem av los rau tej lagluam siv ua luam Special Economic Zones thiab khawb pheev txheej los yog siv coj los ua pas dej tauv tsim hluav taws xob uas cia li muab lawv yuam mus nyob rau tej zos tshiab thiab siv tej av los ua kev uas yog tus twg tsis yeem thiab tsis pom zoo rau raug txhom kaw thiab tsis ua tib zoo sib khom thiab sab laj thiab tsis them nyiaj pauj tej av raws li qhov tsim nyog ntawd kawg nkaus li thiab.
Yog li UNHCR thiaj tau hais kom nom tswv Nplog yuav tsum tau los txheeb xyuas nws tej teeb meem ua rau neeg Nplog ploj yam tsis paub ntab ntw, pej xeem cov kev muaj cai xaiv nom tswv thiab cov kev cam hwm cov neeg pawg tsawg txoj cai thiab cej luam qhia rau UN paub seb nws lis tau tej dej num no txog qhov twg lawm rau lub caij zwj thaj tim 27/07/2020 ntawd.#
Yog koj xav paub kom ntxaws ntxiv ces nyeem tau cov xov xwm raws li cov vas sab hauv qab no:
- Xov xwm hais txog UN lub tuam chav tsim cai pov puag leej tib neeg txoj cai los mloog Nplog cov kev cej luam txog nws cov kev cam hwm human rights hauv Los tsuas teb ua lus Askiv
- Xov xwm hais txog UN lub tuam chav tsim cai pov puag leej tib neeg txoj cai los mloog Nplog cov kev cej luam txog nws cov kev cam hwm human rights hauv Los tsuas teb ua lus Nplog
- Lub koom haum UNPO thiab CWHP cov kev zoo siab txais tos nom tswv America cov tswv yim los pab daws cov xwm txheej cuam tshuam txog cov Hmoob nyob sab qaum teb ntawm teb chaws Nplog ua lus Askiv
- Tsab ntawm muaj ntau pawg neeg koom sau xa mus rau tsoom nom tseem ceeb ntawm lub koom haum European Union kom Nplog cam hwm human rights hauv Los tsuas teb
- Representative Tom Garrett's tsab cai H.Res 992 thiab nws cov lus statement
- Represetative Tom Garrett cov tswv yim los pab daws Nplog cov teeb meem human rights
- United Nations Human Rights Commission Treaty Body cov cai teev txog cov kev cam hwm leej tib neeg txoj cai
- Nyeem tau xov xwm ntxiv txog Sombat Somphone uas Radio Free Asia tshaj tawm tau ntawm no:
- Cov koom haum human rights tau qhuas UN tej dej num tseem txheeb tau tias nom tswv Nplog tsis cam hwm nws tej pej xeem txoj cai
Listen to SBS Radio Hmong program at on Thursday 6pm AEST (Australian Eastern Standard Time) and Sunday 11am AEST.
You can download SBS Radio App from App Store at and from Google Play at or you can download podcasts news in Hmong and English from . and listen to Hmong news in iTunes at
Besides, you can follow us, click like, share and comments at #SBSHmong website at .
Call to have a chat with SBS Radio Hmong Program on + 61 3 9949 2259 or sent your comments to .
