Ntsiab lus tseem ceeb:
- Mark Dreyfus uas yog Australia tus kws lij choj teb chaws yuav xav tsim ib tsab cai los ua kom cov kev coj ib tug twg tej xov xwm ntiag tug mus ntuav qhia rau lwm tus yog ib co kev ua txhaum cai.
- Cov xwm txheej no ces yog cov kev coj ib tug twg tej xov xwm ntiag tug coj mus qhia/faib hauv online txhawb nqa cov kev sib thab sib zes.
- Raws li tej cai tshiab uas xav thov tsim no ces tej neeg uas raug txheeb tau tias tej neeg txhaum uas pheej coj lwm tus neeg tej xov xwm ntiag tug coj mus qhia rau lwm tus yuav raug kaw tsev laj cuj txog li ntawm 7 lub xyoo.
Tej neeg uas muaj hom phiaj phem uas pheej xav coj ib tug neeg twg tej xov xwm ntiag tug coj mus qhia rau hauv online ces tej zaum sai sai tom ntej no kuj yuav raug rau txim kaw tsev laj cuj txog 7 lub xyoo.
Tej neeg uas raug txheeb tau tias tau ua li no yuav raug kaw tsev laj cuj ntev kawg nkaus txog li 6 xyoo, hos tej neeg uas tau tsim tej xwm txheej no yuav raug kaw 7 xyoo yog tias nws txhob txwm tsim tej xwm txheej no los tawm tsam nrog ib tug twg vim tus neeg ntawd yog ib tsav neeg twg, coj ib co kev ntseeg twg los yog nyiam ib hom neeg twg.
Doxing ces yog cov kev pheej coj ib tug twg tej xov xwm ntiag tug li xov tooj, chaw nyob coj mus qhia rau lwm tus yam tsis tau txais kev tso cai ntawm tus tswv thiab feem ntau mas pheej siv coj mus txhawb nqa cov kev sib thab sib zes.
Mark Dreyfus uas yog Australia tus kws lij choj teb chaws tau cog lus tias yuav los tsim tsab cai no tej xov xwm ntiag tug li tej duab, tej social media, raug coj mus nthuav tawm hauv online thaum ntxov xyoo no.
Ces tej cai uas tau coj los sab laj hnub zwj Teeb (Thursday) hauv tsev tsoom fwv thiaj yuav ua rau cov kev coj lwm tus neeg ntiag tug tej xov xwm coj mus qhia lwm tus yam tsis tau txais kev tso cai no yog ib co kev ua txhaum cai.
Ces raws li Dreyfus tau hais ua ntej yuav coj tsab cai no los sab laj hauv tsev tsoom fwv hnub zwj Teeb no ces 'cov kev txwv no thiaj yuav xyuas kom tau txais kev pov puag zoo tuaj ntxiv hauv online rau tej neeg thiab kom tej neeg sawv dws muaj peev xwm tswj tau lawv tej xov xwm ntiag tug'.
Nws tau hais tias "Neeg Australia yeej muaj txoj cai uas lwm tus yuav tau hwm lwv tej privacy, thiab thaum lawv hais kom muab lawv tej xov xwm ntiag tug rau lawv, ces lawv muaj cai tau txais kev pov puag.''
Ces thiaj tau tsim ib co privacy code coj los pov puag tej me nyuam yaus twg tsi ntseeg kom tsis txhob raug teeb meem hauv online.
Tab sis tsab cai no yuav tsis zam rau tej lagluam, thiab cov kev tsis tau txais kev tso cai ntawm tej tswv kom tej tuam txhab lagluam loj tsis txhob muaj peev xwm siv tau tej lus zoj khi sib chab sib chaws los zoj los yog muaj tej cai tsis tas teev yus tej xov xwm, uas kuav cov kev tsis pub siv zej tsoom tej xov xwm.
Yog li ntawd 3 lub tswv yim no thiab tseem yuav txiav txim txog tej cai 2 uas tswj tej neeg tej privacy ntxiv, tab sis tej zaum ntshe yuav tsis tau muaj peev xwm los qhia txog tej no ua ntej yuav muaj cov kev xaiv tsa tsoom fwv teb chaws uas tau teev tseg rau lub 5 hlis ntuj xyoo 2025.
Thawj pwm tsav Anthony Albanese tau hais tias ''yog tej yam yuav tsis nyog'' uas tej neeg pheej raug tej teeb meem no vim lawv coj lawv ib co kev ntseeg twg.
Ua ke no los tej cai uas txwv tsis pub hais tej lus thuam saib tsis tau ib tug twg los kuj tau cog lus tias yuav ua kom tau coj los siv nrog cov kev tawm tsam tej xwm txheej uas pheej coj ib tug twg tej xov xwm ntiag tug coj mus qhia rau lwm tus ua cov kev sib thab sib zes rau hnub zwj Teeb (Thursday) no thiab, ces thiaj tau tso tseg tej cai no tom qab tsis muaj peev xwm yuav sib khom kom tsim tau tej cai tswj cov kev ywj pheej rau tej kev ntseeg thiab tawm tsam tsis pub faib cai lwm tus.
Vim tseem muaj cov kev sib cov nyom ntawm pab nom Labor thiab lwm pab nom teb chaws tias yuav ua li cas koj thiaj tsim tau tej cai tsim nyog coj lso tswj cov kev pheej cai ua tsis ncaj rau ib co neeg uas ntseeg ib hom kev ntseeg twg li muaj peev xwm rho tej neeg ua hauj lwm uas yog neeg gay tawm tsis pub ua hauj lwm thiab tej teeb meem phom sij ua tsis ncaj uas cuam tshuam nrog tej cai txwv tsis pub hais lus phem thuam thiab saib tsis tau ib tug twg.
Thiab tsab cai uas raug txheeb no los ntshe xyov puas yuav teev txog cov kev rau ntau yam txim loj vim tau hais lus thuam thiab saib tsis tau ib tug twg uas raug tsim los ua cai siv coj los tawm tsam nrog tej tswv yim tsis nyiam tej neeg Jews thiab pheej hais lus phem rau tej neeg pawg tsawg.
Ces tej zaum thiaj li yuav rov qab ua rau muaj cov kev sib teev theem txog cov kev pov puag tej zejzog neeg pawg tsawg thiab cov kev tawm tsam nrog lub tswv yim tsis nyiam tej neeg Jews tom qab tau muaj cov pawg neeg Jews thiab Muslim thiab tej zejzog neeg queer tau zoo siab nrog cov kev xub qhia txog tias yuav tsim tsab cai anti-vilification laws ntawd.
Txawm li cas los kuj tseem muaj lwm pawg neeg muaj kev txhawj xeeb tias tsam yuav ua rau tsis muaj peev xwm tawm tau tswv yim ywj pheej lawm thiab.
Tab sis tej nom tswv xeev tej cai yeej pov puag tej neeg thiab tsis pub ib tug twg hais lus phem, thuam thiab saib tsis taus ib tug twg siv lawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
