Ntsiab lus tseem ceeb:
- Tej cuab yig txuag tau nyiaj tsawg tshaj plaws rau lub caij 17 xyoo no.
- Tej economists tshab txhais txog tej cwj pwm txuag nyiaj uas tau hloov rau lub caij tshaj 10 xyoo no tau ua rau leej twg yog cov txom nyem nyiaj txiaj siv.
- Ces thiaj muaj kev sib tu ncua rau nyiaj txiaj siv ntawm tej hluas thiab tej laus rau tej xwm txheej lagluam tam sim no uas ''tau txiaj ntsim rau tej neeg muaj tej peev txheej nyiaj txiaj xwb.''
Txhua txhua $100 uas ib tug neeg Australia khwv tau ces tsuas txuag tau 60 cents kom thiaj tau nyiaj siv rau lub caij txom nyem nyiaj txiaj xwb.
Ces txij xyoo 2007 los no thiaj ua rau haiv neeg Australia cov kev txuag nyiaj tsawg tshaj plaws raws li tej xov xwm National Accounts uas lub koom haum Australian Bureau of Statistics tau teev tseg, uas qhia txog ntau yam thiab ntau cov xwm txheej lagluam.
Tsis tas li ntawd los tej xov xwm tau coj los qhia txog Australia tej Gross Domestic Products (GDP) los kuj poob sib law liag rau 6 quarters lawm thiab.
Stephen Bartos uas yog ib tug economist thiab yog ib tug zes kais ntawm tsev kawm qib siab University of Canberra, tau qhia rau SBS News tias Australia tej lagluam ces 'tsuas mus taus xwb.''
Yog li ntawd tej neeg Australia twg yog cov txom nyem nyiaj txiaj siv ntau tuaj ntxiv?
Muaj kev pauv hloov li cas rau peb tej cwj pwm txuag nyiaj?
Bartos tau hais tias txog rau lub 6 hli ntuj dhau los ces neeg Australia tsuas txuag tau 60 cents xwb thaum lawv txheeb seb tej cuab yig siv nyiaj thiab txuag nyiaj li cas.
Zeskais Bill Mitchell uas yog ib tug paub zoo txog lagluam ntawm tsev kawm qib siab University of Newcastle tau hais tias yeej tsis pom tias tej neeg yuav txuag tau nyiaj tsawg npaum no vim lub caij xyoo 1970s ntawd yeej muaj neeg txuag nyiaj tau txog 16 dollars ntawm 100 dollars yus khwv tau tom qab them se lawm, tab sis tam sim no tej neeg txuag tau 60 cents xwb.
Mitchell tau hais tias lub caij xyoo 1990s ces tej cai tswj nyiaj txiaj ua rau tej neeg txuag tau tsawg vim pheej tiv nqe ntau ntxiv rau lub caij tsoom fwv tau nyiaj puag xyoo tsam ntau zaus.
Nws tau qhias rau SBS News tias "Thiaj ua rau tej neeg pib txuag nyiaj tsawg zog lawm, thiab lub caij ntiaj teb ntsib teeb meem nyiaj txiaj ces txawm ua rau tej neeg txuag tsis tau nyiaj li lawm.''
Tab sis lub caij muaj kab mob kis thoob ntuj ces rov qab muaj neeg txuag tau nyiaj ntau ntxiv, vim yuav tau ceev faj tias siv ua dab tsi, tab sis txij ntawd los ces kuj rov qab txuag tau tsawg lawm.
Tsis yog koj tib leeg thiaj tsis muaj peev xwm txuag tsis tau nyiaj xwb.
Vim ''txuag tsis tshua tau nyiaj lawm'' thiab tej cuab yig los kuj siv nyiaj ntau ces Mitchell thiaj qhia tias paub tseeb lawm tias tej neeg Australia yuav tau tig mus siv lawv tej nyiaj uas lawv txuag tau.
Nws tau hais tias "Tej neeg khwv tau nyiaj tsawg dua, ces yeej tsis txuag nyiaj li lawm, thiab pheej siv lawv tej credit cards xwb, ces thiaj yog tej yam tsis zoo, ... ces yog thaum tej neeg txuag tau nyiaj tsawg ces tej cuab yig thiaj muaj nuj nqes ntau ntxiv.''
"Thiaj ua rau tej hluas tsis muaj nyiaj, thiab txom nyem. Thiab tej poj niam nyob tib leeg uas yog cov neeg hnoob nyoog tshaj 50 xyoo thiab sib nrauj lawm kuj yog cov txom nyem nyiaj txiaj thiab,
"Yog tias ib tsev neeg twg yuav tau them nuj nqe yuav tsev, ces thawj yam ces yog yuav tau xyuas kom them tau tsev, li yuav tau tsis txhob siv nyiaj yuav zaub mov ntau, los yog tsis txhob siv nyiaj ntau, los yog tsis txhob mus holidays, li peb pom tias tej me nyuam tsis mus excursions, tsis yuav khaub ncaws tshiab hloov, thiab lwm yam.''
Illion uas yog ib lub koom haum nto npe tau qhia tias tej xov xwm tshiab Consumer Credit Stress Barometer yeej tau qhia tias yuav ua rau tej neeg Australia yuav tsis muaj peev xwm them tau lawv tej nuj nqes.
Tej neeg Australia hnoob nyoog qes dua 50 xyoo raug teeb meem ntau tuaj ntxiv txog 2 feem puas rau lub caij 3 hlis txog 6 hli ntuj dhau los. Hos tej neeg hnoob nyoog tshaj 50 xyoo rov sauv ces yuav ntsib teeb meem ntau tshaj plaws ntxiv tshaj 4 feem pua lawm.
Tej xov xwm tshiab qhia dab tsi txog peb tej lagluam?
Tej xov xwm tshiab (04.09.2024) qhia tias txawm tias muaj neeg siv nyiaj tsawg lawm, los Australia tej lagluam kuj tau loj hlob txog li 0.2 feem pua rau lub 6 hli ntuj dhau los lawm.
Treasurer Jim Chalmers thiaj tau los tiv thaiv tsoom fwv tej tswv yim tswj lagluam tias twb vim yog txhab nyiaj faj seeb haiv (Reserve Bank of Australia - RBA) tau nce kab theem paj ntau zaus thiaj tau ua rau ''muaj teeb meem'' rau Australia tej lagluam.
Mr Chalmers tau qhia rau tej neeg nthuav xov xwm tias "Peb yeej pom tias muaj ntau yam xwm txheej ntiaj tsis paub tias xyov yuav zoo li cas, tej nyiaj poob nqe ua ntuv zus thiab kab theem pej kim, uas kuv xav tias yog tej yam cov nyom no ua rau peb tej lagluam loj hlob qeeb.''
Thiab lub caij uas tsoom fwv tsis tshuaj muaj peev xwm tswj tau kab theem nyiaj poob nqe uas tau nqe los ua 3.5 feem pua rau lub 7 hli ntuj dhau los ntawd, Bartos tau ceeb toom txog tsoom fwv cov kev yuav siv nyiaj tsawg tias.
"Yog tej yam nyuaj kawg. Yog tias tsoom fwv tseem siv lub tswv yim siv nyiaj tsawg kom thiaj tswj tau nyiaj poob nqe, ces yuav ua rau lagluam tsis zoo thiab.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
