Australia mipi tam deuh khuaruahnak ah a um mi cu kum 20 luan a si cang mi mino cu nule pa sinah khua an sak ding a si ti lo, an mah tein inn dang an hlan awk a si cang ti ruahnak an ngei. Nain, nihin ni kan dirhmun zoh tikah nulepa sin khua a sa rih mi an tam. A luancia kum 20 lio he khan cun a dang ngaingai cang.
Household, Income and Labour Dynamics in Australia survey cu Australia mipi dirhmun chungkhar dirhnak, thla hlawh, riantuannak lei he a pehtlaimi thil vialte zohchih in hlethlainak an tuahnak a si. Cu hlethlainak a tuahtu nih cun 2001 in 2021 tiang hlethlainak an tuah, minung 17,000 tluk le chungkhar 9000 tluk an dirhmun an kherhlai hna.
Hlethlainak chungah mino (kum 18 in 29 kar) pa zeizah dah nulepa sinah khua a sa rih timi zong an zoh. A luancia kum 20 lio nakin nihin ni ah nulepa sin a um rih mi mino an tam deuh tiin hlethlainak nih a langhter. 2010 thokin tlangval (kum 18 – 29) pawl hi nulepa sinah khua a sa rih mi an karh. Cun 2015 hnu in kum 18 – 29 kar nungak nule pa sin ah khua a sa rih mi an karh ve timi an hmu khawh.
Kum 26 a tling cang mi mino hi nulepa sinah an um awk a si ti ma, si ti lo timi lunglaknak an tuah i minung 2000 leng nih an ruahnak an langhter. Cu lunglaknak ah cun kum 26 a tling cang mi cu nule pa sin ah an um awk si ti lo timi nih a tei.
HILDA nih an hmuh khawh mi cu tlangval kum 26 in 29 kar a si mi, a nulepa sin ah khua a sa rih mi hi zatuak 31.2% an si. Cun, kum 26-29 kar nungak nule pa sin ah khua a sa rih mi hi zatuak 27.9% an si. Aluancia kum 20 lio dirhmun he zohtik ah zatuak 9.9% le 11.6% in an karh timi hmuh khawh a si.
Kum 20 hnu ah thlennak nganpi a um mi pakhat cu kum 18 in 21 kar nungak nule pa sin ah khua a sa rih mi hi zatuak 79.5% a si. A luancia kum 20 lio he cuaithlai tti tikah Zatuak 17.6% tluk in an karh.
A tlangpi in kum 18 in 29 kar tlangval nule pa sin ah khua a sa rih mi hi 2021 tiangah zatuak 54.3% an si I 2001 lio he cuaithlai tti tikah zatuak 7.7% tluk lawng dannak a um. Cun kum 18 in kum 29 kar nungak pawl nulepa sin ah khua a sa rih mi hi zatuak 46.7% an si, 2001 lio he cuaithlai tti ahcun zatuak 10.8% tluk in an tam deuh.
HILDA nih an purhdah khawh rih mi cu mino in a chuak mi hi an kir than ti lo ti khawh a si. Inn in a chuak I a kir than mi cu an um ko nain nu le pa an pahnih fonh ah zatuak 3% lawng inn ah an kir than.
“Kum 18 in 21 kar tlangval inn in a chuak mi chungin nulepa sinah a kir than mi hi zatuak 8.4% an si, anmah kum rup inn a chuak mi chungin nulepa sin a kir than mi hi zatuak 8.1% an si. Nulepa sinah a kir than mi an tam bik kum cu 2018 in 2020 kar a si” tiin ripawt an chuahmi nih a langhter.
NSW, ACT le Victoria hi ram chungah inn hlan man a fah biknak hmun an si caah atulio dirhmun hin cun nulepa inn a chuahtak mi an tlawm lai, ramkulh dang he dannak a um um ngaingai lai tiin HILDA nih ripawt ah an tial.
"Australia ram huap ningin tlangval inn dang a hlang mi an tlawm biknak hmun cu New South Wales le Australian Capital Territory a si. 2001 in 2003 kar ah nule pa inn in a chuak mi tlangval hi zatuak 23.8% an si nain 2018 in 2020 kar ah inn dang a hlangmi hi zatuak 13.5% lawng an si cang" tiin ripawt ah an tial.
COVID-19 pulrai zawtnak ruangah zapi khuasak tintukning thlennak a chuahpi ngaingai.
